AQSh-ta ımmıgratsııa qyzmetkerlerine denege taǵatyn kameralar beriledi

ASTANA. KAZINFORM – AQSh-tyń ishki qaýipsizdik mınıstri Krıstı Noem Mınnesota shtatynda jumys isteıtin barlyq federaldy ımmıgratsııa agentterine jaqynda denege taǵatyn beınekameralar beriletinin málimdedi, dep habarlaıdy BBC.

Mundaı sheshimge mınıstrlik vedomstvo ókilderiniń Mınesota shtatynda ımmıgratsııalyq operatsııalar kezinde eki adamnyń mert bolýyna baılanysty qabyldap otyr.

Eske salaıyq, qańtar aıynyń basynda AQSh-tyń ımmıgratsııa qyzmetiniń ókili Mınnesota shtatyna qarasty Mıneapolıste áıeldi atyp óltirdi.

AQSh bıliginiń málimdeýinshe, áıel óziniń kóligimen qyzmetkerdi qaǵyp ketpek bolǵan.

Qaza tapqan Rene Gýd — AQSh azamaty, jergilikti turǵyn.

Osy oqıǵalardan keıin Alıaska shtatynan saılanǵan senator Lıza Mýrkovskı men Soltústik Karolınadan saılanǵan Tom Tıllıs Respýblıkalyq partııanyń ustanymyna qarsy shyǵyp, Krıstı Noemniń otstavkaǵa ketýi kerektigin talap etti. Olaı bolmaǵan jaǵdaıda prezıdent Donald Tramptyń ony qyzmetten bosatý qajettigin aıtty.

Olar Senattaǵy birneshe demokratqa qosylyp, Mınneapolıstegi ımmıgratsııalyq operatsııa kezinde qaza bolǵan Aleks Prettı men Rene Nıkol Gýdtyń ólimi boıynsha kinálilerdiń jaýapqa tartylýyn talap etti.

- Mınneapolıstegi qyzmetkerlerdi denege taǵylatyn kameralarmen qamtamasyz etemiz. Bul sheshim qazirden bastap kúshine enedi, — dep jazdy Krıstı Noem dúısenbi kúni X áleýmettik jelisinde.

Sonymen qatar Hennepın okrýginiń sot-medıtsınalyq sarapshysy 24 qańtarda Aleks Prettıdiń ólimi basqa adamnyń áreketi saldarynan bolǵanyn resmı túrde rastady. Alaıda homicide termıni bul árekettiń avtomatty túrde qylmys ekenin bildirmeıtini atap ótildi.

Saraptamaǵa sáıkes, Prettı quqyq qorǵaý organynyń bir qyzmetkeri atqan birneshe oqtan jaralanyp, aýrýhanada kóz jumǵan. Qosymsha derekter joq.

AQSh-tyń Keden jáne shekara qyzmeti Prettıdiń ólimine qatysy bar eki qyzmetkerde denege taǵylatyn kamera bolǵanyn, ekeýiniń de ýaqytsha jumystan shettetilgenin habarlady. Al Ádilet mınıstrligi bul is boıynsha shekarashylardyń áreketteriniń zańdylyǵyn tekserý úshin aldyn ala tergeýdi bastady.

Krıstı Noemniń aıtýynsha, keıin mundaı kameralar el boıynsha barlyq ımmıgratsııalyq qyzmetkerlerge taratylmaq.

Denege taǵylatyn kameralar — demokrattar talap etip otyrǵan ımmıgratsııalyq organdardyń jumysyndaǵy ózgeristerdiń biri. Olar bul reformaǵa qarjy qarastyrylmaıynsha, kezekti federaldy bıýdjetti qoldaýdan bas tartyp otyr. Sonyń saldarynan AQSh-ta úshinshi kún qatarynan federaldy bıliktiń jumysy ishinara toqtaǵan.

BBC dereginshe, qazir Immıgratsııa jáne keden qyzmeti (ICE) AQSh-taǵy ózge quqyq qorǵaý organdaryna qaraǵanda kóbirek qarjy alady. Ótken jyly Kongress bul qyzmetke 80 mlrd dollar bólgen.

Prezıdent Donald Tramp ta Krıstı Noemniń málimdemesine pikir bildirdi.

- Jalpy alǵanda, bul quqyq qorǵaý organdary úshin jaqsy. Óıtkeni adamdar ne bolǵany týraly ótirik aıta almaıdy. Meniń oıymsha, bul 80 paıyz jaǵdaıda qyzmetkerlerdiń ózine tıimdi, — dedi ol.

Osyǵan deıin Tramp AQSh-tyń salyq qyzmetin sotqa berip, 10 mıllıard dollar talap etkeni týraly jazdyq.