AQSh prezıdenti Donald Tramptyń reıtıngi 33%-ǵa deıin tómendedi

ASTANA. KAZINFORM — AQSh prezıdenti Donald Trampty qoldaý reıtıngi Iranǵa qarsy áskerı áreketterdiń saldarynan quldyrap ketti, dep habarlaıdy Kazinform agenttiginiń Vashıngtondaǵy menshikti tilshisi.

Massachýsets ýnıversıtetiniń Amherstegi zertteýine sáıkes, saýalnamaǵa qatysqandardyń 33%-y ǵana prezıdenttiń jumysyn qoldaıtynyn aıtqan. Al 62%-y onyń qyzmetin quptamaıtynyn bildirse, 53%-y «tolyqtaı qoldamaıtynyn» jetkizgen, dep jazady The Hill.

Taıaý Shyǵystaǵy qaqtyǵysqa qatysty respondentterdiń tek 29%-y Tramptyń Iranǵa soqqy berý týraly sheshimin qoldaıtynyn málimdegen. Al 63%-y bul baǵyttaǵy áreketterin quptamaıdy.

Sonymen qatar, jańa saýalnamaǵa qatysqandar Tramptyń ınflıatsııamen kúrestegi jumysyn da álsiz dep baǵalaǵan. Saýalnamaǵa qatysqandardyń tek 24%-y prezıdent bul máseleni tıimdi sheship jatyr dep eseptese, 71%-y onyń jumysy «nashar» nemese «óte nashar» degen pikir bildirgen.

Amherstegi Massachýsets ýnıversıteti júrgizgen saýalnamaǵa 20–25 naýryz aralyǵynda 1000 adam qatysqan. Qatelik shegi shamamen 3,5 paıyzdyq tarmaqty quraıdy.

Buǵan deıin Tramptyń reıtıngi aqpan aıynda 39% bolǵany habarlanǵan edi.

Sondaı-aq Tramptyń ımmıgratsııa máselesi boıynsha reıtıngi tómendegeni týraly da jazdyq.