AQSh pen Qytaı jasandy ıntellekt salasynda kóshbasshy atandy

ASTANA. KAZINFORM – Shanhaıdaǵy jasandy ıntellekt boıynsha Dúnıejúzilik konferentsııada Qytaıdyń ǵylymı jáne tehnologııalyq aqparat ınstıtýty men Pekın ýnıversıteti daıyndaǵan jasandy ıntellekt ınnovatsııasynyń jahandyq ındeksi týraly baıandama usynyldy, - dep habarlaıdy TASS.

Baıandama avtorlary bes krıterıı boıynsha 46 eldi zerttedi: negizgi qoldaý, damý resýrstary men ortasy, ǵylymı jáne tehnologııalyq zertteýler men ázirlemeler, ónerkásip jáne ınnovatsııalardy qoldaný, halyqaralyq yntymaqtastyq pen qarym-qatynas. Elder 39 kórsetkish boıynsha taldandy, olardyń árqaısysy úsh deńgeıli júıe boıynsha baǵalandy.

Málimetke sáıkes, AQSh pen Qytaı JI boıynsha álemde úlken aıyrmashylyqpen kósh bastap tur. Zertteýshilerdiń aıtýynsha, JI chıpterin, joǵary bilikti mamandardy, jetekshi ǵylymı jýrnaldardaǵy maqalalardy jáne negizgi JI modelderin shyǵaratyn kompanııalardyń kópshiligi osy elderde.

AQSh 100 upaıdan 77,97, Qytaı 58,01, Ulybrıtanııa 36,60 upaı jınady.

Sondaı-aq alǵashqy ondyqqa Japonııa (33,77), Koreıa Respýblıkasy (33,48), Germanııa (32,22), Sıngapýr (31,57), Frantsııa (30,98), Kanada (29,79) jáne Úndistan (29,41) kirdi. Reseı 17,49 upaımen 30-orynǵa turaqtady.

Shanhaıda ótken dúnıejúzilik jasandy ıntellekt konferentsııasy bıyl 26-28 shildede ótedi. Ol 2018 jyldan bastap jyl saıyn ótkizilip keledi. Bul alań Shanhaıda jasandy ıntellekt salasyndaǵy iri salalyq kóshbasshylardy jınaıdy. Oǵan iri kompanııalardyń basshylary, memleket qaıratkerleri, ǵalymdar men sarapshylar qatysady. Olar ózara baılanys ornatady jáne jasandy ıntellekt tehnologııalaryn damytý men qoldanýdyń odan ári joldaryn talqylaıdy.

Qazaqstandyq JI endi vıdeony 5 tilge aýdaryp, ulttyq naqyshta sýret salatynyn jazǵan edik.