AQSh pen Qytaı «saýda soǵysyn» báseńdetý jóninde kelissózderdi bastady

ASTANA. KAZINFORM – AQSh pen Qytaı delegatsııalary Jenevada álemdegi eń iri ekonomıkalar arasyndaǵy saýda soǵysyn báseńdetýge baǵyttalǵan joǵary deńgeıdegi kelissózderdi bastady, Euronews.

Amerıkalyq delegatsııany Qarjy mınıstri Skott Bessent, al qytaılyq delegatsııany He Lıfen basqaryp otyr.

Kezdesý orny naqty jarııalanbaǵan, al eki eldiń resmı ókilderi jýrnalıstermen tek anonım túrde pikir almasyp jatyr.

Sarapshylar kelissózderden úlken nátıje kútpeıdi, degenmen kedendik bajdar boıynsha ózara belgili bir ymyraǵa kelip, bul jahandyq saýdaǵa keltiriletin zalaldy azaıtyp, qarjy naryqtaryna biraz senim uıalatady dep úmittenýde.

Sáýir aıynda AQSh prezıdenti Donald Tramp Qytaıdan keletin ımportqa salynatyn baj salyǵyn 145%-ǵa deıin kótergen, al Qytaı jaýap retinde AQSh taýarlaryna 125% baj engizgen. Bul ekijaqty saýdanyń is júzinde toqtaýyna ákelip otyr. Ótken jyly bul saýdanyń jalpy kólemi 660 mıllıard dollardan asqan.

Kelissózder bastalmaı turyp-aq Tramp Truth áleýmettik jelisinde baj salyǵyn 80%-ǵa deıin tómendetýge daıyn ekenin meńzegen.

Donald Tramp «tarıftik soǵysty» óziniń alǵashqy prezıdenttik merziminde bastady. Ol kezde Qytaıdy ádiletsiz básekelestikke — kontrafakt ónimderdi qoldaný, Batys kompanııalaryn tehnologııalaryn berýge májbúrleý jáne dempıngke arnalǵan memlekettik sýbsıdııalardy keń qoldaný — aıyptaǵan.

Beıjiń bul aıyptaýlardy negizsiz dep sanaıdy jáne Tramptyń joǵary bajdaryn tek Qytaıǵa ǵana emes, basqa elderge de engizgenin eske salady.

Ótken jyly AQSh-tyń Qytaımen saýda balansynyń tapshylyǵy 263 mıllıard dollar boldy.

Buǵan deıin Tramp engizgen tarıfterdiń orama ónimder naryǵyna qalaı áser etkeni týraly habarlanǵan bolatyn.

Aıta ketelik sáýir aıynda Qytaıda eksport 8 paıyzǵa ósken.