AQSh Nıgerııaǵa taǵy 200 áskerı qyzmetker jiberedi
ASTANA. KAZINFORM – AQSh terrorızmge qarsy kúres aıasynda Nıgerııaǵa burynnan ornalastyrylǵan shaǵyn amerıkalyq áskerı kontıngentke qosymsha taǵy 200 áskerı qyzmetker jiberedi, dep habarlaıdy Anadoly.
Jergilikti BAQ málimetinshe, AQSh ákimshiligi Batys Afrıkada, ásirese Nıgerııada terrorıstik belsendiliktiń artýyna baılanysty eleýli alańdaýshylyq bildirip otyr.
Málimetterde AQSh qaýipsizdik salasyndaǵy ortaq alańdaýshylyqtardy bólisetin daıyn ári qabiletti seriktestermen yntymaqtastyqty damytýǵa umtylatyny aıtylǵan.
Áskerı qyzmetkerlerdi jiberý AQSh pen Nıgerııa úkimetteri arasyndaǵy ózara kelisim aıasynda júzege asyrylady. Nıgerııa Qorǵanys mınıstrliginiń ókili Samaıla Ýba amerıkalyq áskerı qyzmetkerlerdiń tikeleı áskerı operatsııalarǵa qatyspaıtynyn naqtylady.
AQSh Qarýly kúshteriniń Afrıka qolbasshylyǵynyń (AFRICOM) qolbasshysy general Dagvın Anderson tórtinshi aqpanda Nıgerııaǵa shaǵyn áskerı kontıngent jiberiletinin jarııalaǵan bolatyn. Alaıda ol áskerı qyzmetkerlerdiń elge naqty qashan kelgenin habarlaǵan joq.
Nıgerııa qorǵanys shtabynyń málimdemesinde amerıkalyq personaldy ornalastyrý eki el arasyndaǵy ekijaqty yntymaqtastyq sheńberinde júzege asyrylyp jatqany atap ótildi.
Qujatta bul yntymaqtastyq áleýetti damytý, kásibı áskerı daıarlyq, barlaý málimetterimen almasý, logıstıkalyq qoldaý kórsetý, sondaı-aq terrorızm men transshekaralyq qaýipterge qarsy is-qımyl boıynsha strategııalyq dıalogty qamtıtyny kórsetilgen.
Aıta ketelik Indonezııa Gaza sektoryna 8 myńǵa deıin áskerı qyzmetker jiberýi múmkin.