AQSh Memlekettik hatshysy Palestına memleketin qurýdy jedeldetýge shaqyrdy

AQSh memlekettik hatshysy Entonı Blınken Gaza sektoryndaǵy áskerı qımyldardy toqtata turýǵa shaqyrǵan dıplomatııalyq týryn jalǵastyryp jatyr. Kazinform bul týraly VVS-ge silteme jasap habarlaıdy. 

Osy demalysta memlekettik hatshy Blınken Batys Jaǵalaýdaǵy Ramalla qalasyna aıaq asty saparlap baryp, Palestına avtonomııasynyń prezıdenti Mahmýd Abbaspen kezdesti.

"AQSh Memlekettik departamenti ókiliniń sózinshe, kezdesý barysynda Blınken AQSh-tyń asa mańyzdy gýmanıtarlyq kómekti jetkizý jáne Gaza sektorynda negizgi qyzmetterdi jańǵyrtýǵa nıettes ekenin rastady. Sondaı-aq, ol palestınalyqtardy kúshtep kóshirýge bolmaıtynyn anyq túsindirdi", - dep málim etti Memlekettik departament ókili Metıý Mıller.

Blınken men Abbas Batys Jaǵalaýda tynyshtyq pen turaqtylyqty qalpyna keltirý úshin kúsh salý, onyń ishinde palestınalyqtarǵa qarsy kúsh kórsetýdi toqtatyp, kinálilerdi jaýapqa tartý keregin talqylaǵan.

Sonymen qatar Blınken AQSh “Palestına memleketin qurýǵa degen palestınalyqtardyń zańdy umtylysyn júzege asyrý” úshin jumys isteýge daıyn ekenin bildirdi.

Mahmýt Abbas AQSh memlekettik hatshysyna dereý oq jaýdyrýdy toqtatyp, Gaza sektoryna gýmanıtarlyq kómek kirgizýge ruqsat berý keregin aıtty.

Sondaı-aq, ol “Gaza sektoryndaǵy palestına halqy ızraıldik áskerı mashınadan qalaı zardap shegip jatqanyn sıpattaýǵa sózim jetpeıdi”, - dedi.

Senbi kúni Blınken Iordanııa men Egıpet syrtqy ister mınıstrlerimen birlesip baspasóz konferentsııasyn ótkizip, oqty toqtatý ıdeıasyn joqqa shyǵardy. Bul - HAMAS tobyna qaıta jasaqtalýǵa múmkindik beretinin aıtyp, onyń ornyna gýmanıtarlyq úziliske shaqyrdy.