AQSh Qazaqstannyń klımat máseleleri boıynsha qyzmetin qoldaıdy
Bul týraly Qazaqstan Respýblıkasy Prezıdentiniń halyqaralyq áriptestik jónindegi arnaıy ókili Erjan Qazyhanov pen QR Ekologııa, geologııa jáne tabıǵı resýrstar mınıstri Maǵzum Myrzaǵalıevtiń AQSh Prezıdentiniń klımat jónindegi arnaıy ókili Djon Kerrımen ótken ekijaqty onlaın kezdesýinde aıtyldy.
Qazaqstan ókilderi kómirtekti beıtaraptyqqa jetý boıynsha qabyldanyp jatqan sharalar, jańa Ekologııalyq kodekstiń normalary jóninde aqparat berdi. Sonymen qatar dástúrli energetıkalyq resýrstardyń mol ekenine qaramastan, Qazaqstan Parıj kelisiminiń maqsattaryna belsendi umtylyp jatqanyn atap ótti.
Budan bólek, «jasyl» qarjylandyrý jobalary aıasynda AQSh-pen áriptestik aıasyn keńeıtýge qyzyǵýshylyq tanytyldy.
Djon Kerrı Qazaqstannyń klımattyń ózgerýi máseleleri boıynsha qyzmetin joǵary baǵalap, Prezıdent Q.J. Toqaev ótken jyly jeltoqsanda klımattyq ambıtsııalar Sammıtinde aıtqan maqsattar men mindetterdi atap ótti.
Maǵzum Myrzaǵalıev Qazaqstannyń TMD memleketteri arasynda birinshi bolyp Parıj kelisimin ratıfıkatsııalaǵanyn jáne Ortalyq Azııada «jasyl ekonomıkany» damytý boıynsha kóshbasshy ekenin eskere otyryp, elimizde klımattyq suraqtar boıynsha Ortalyq Azııanyń Aımaqtyq habyn qurý týraly usynys bildirdi.
«Habtyń qyzmetin aımaq elderiniń «jasyl ekonomıkalyq» ósimdi qamtamasyz etý jolynda kúsh biriktirýine, «jasyl» tehnologııalar transfertine, bilim almasýǵa jáne halyqaralyq ınstıtýttar tarapynan qarjy tartýǵa baǵyttaýǵa bolady», - dedi vedomstvo basshysy.
Bul turǵyda AQSh Prezıdentiniń Arnaıy ókili sýtek óndirisiniń dástúrli energııa kózderine balama retinde keleshegi zor baǵyt ekenin atap ótti.
Budan bólek, Qazaqstan tarapy osy kúzde Túrkistan qalasynda C5+1-ke qatysýshy elderdiń Ekologııa mınıstrleriniń kezdesýin ótkizý týraly bastama kóterdi. Bul bastamany AQSh tarapy qoldap, aımaqtyq dıalog aıasynda jumys qarqynyn arttyrýdyń mańyzdylyǵyn atap ótti.
Áńgime barysynda taraptar Aral teńizin qalpyna keltirý taqyrybyn jáne Qazaqstan men Ortalyq Azııadaǵy basqa da problemalardy qozǵady.
Amerıkalyq áriptesterge Qazaqstannyń ınvestıtsııalyq áleýeti týraly aıtylyp, geologııa, jasyl energetıka jáne jańa tehnologııalar salasynda birge júzege asyrýǵa bolatyn birqatar joba usynyldy.
Usynylǵan bastamalar AQSh tarapynan jaqsy qabyldandy. Kezdesý qorytyndysy boıynsha taraptar atalǵan baǵytta birlesken jumysty jalǵastyrýǵa kelisti.
