AQSh BUU-nyń gýmanıtarlyq qyzmetine 2 mlrd dollar bóledi
ASTANA. KAZINFORM – BUU men AQSh Ózara túsinistik týraly memorandýmǵa qol qoıdy, oǵan sáıkes Qurama Shtattar halyqaralyq uıymnyń gýmanıtarlyq qorlaryna 2 mlrd dollar bólý mindettemesin aldy, dep habarlaıdy Kazinform.
Kelisim Ýkraına, Gaıtı, Sýdan jáne Sırııany qosa alǵanda, 17 elge kómek kórsetýdi qarjylandyrýdy, sondaı-aq Tótenshe jaǵdaılarǵa jaýap berý Ortalyq qoryna jarna salýdy kózdeıdi.
BUU Bas hatshysy Antonıý Gýterrısh bul qarajat Uıymnyń ómirdi saqtap qalý, halyqtyń eń osal toptaryna kómek kórsetý jáne adamdardyń azap shegýin azaıtý múmkindigin arttyratynyn atap ótti.
- Árbir dollar mańyzdy jáne biz bul qoldaýdy qıyn-qystaý jaǵdaıda qalǵan adamdar úshin naqty nátıjelerge qol jetkizý úshin múmkindiginshe tıimdi paıdalanýdy kózdep otyrmyz, - delingen BUU basshysynyń baspasóz qyzmeti taratqan málimdemede.
Jahandyq gýmanıtarlyq daǵdarystyń kúsheıýi aıasynda Gýterrısh sondaı-aq barlyq donorlardy kúsh-jigerin arttyryp, gýmanıtarlyq operatsııalarǵa qoldaý kórsetýdi kúsheıtýge shaqyrdy.
Bas hatshynyń gýmanıtarlyq máseleler jónindegi orynbasary jáne BUU Tótenshe kómek jónindegi úılestirýshisi Tom Fletcher salyq tóleýshilerdiń óz qarajattarynyń qalaı paıdalanylyp jatqanyn bilýge quqyǵy bar ekenin málimdedi. BUU árbir dollardyń ómirdi saqtap qalýda naqty nátıjeni qalaı qamtamasyz etip otyrǵanyn kórsetýdi kózdep otyr.
Bas hatshynyń orynbasary sonymen qatar gýmanıtarlyq júıe bıýrokratııalyq protsedýralardy qysqartyp, fýnktsııalardyń qaıtalanýyn joıyp, 2026 jyly 87 mln adamnyń ómirin saqtap qalý maqsatymen basymdyqtardy belgilep jatqanyn atap ótti.
Buǵan deıin Germanııada tegin azyq-túlik taratatyn pýnktterdiń qyzmetin paıdalanatyndardyń shamamen 30 paıyzy – balalar ekenin jazǵan bolatynbyz.