AQSh bıligi birneshe BAQ-qa jazylýdan bas tartpaq

ASTANA. KAZINFORM —  AQSh bıligi «Azattyq radıosy» men «Amerıka daýysy» úshin AP, Reuters jáne AFP aqparat agenttikterine jazylýdan bas tartpaq, dep habarlaıdy VVS.

Bul týraly Donald Tramp taǵaıyndaǵan AQSh-tyń Jahandyq medıa agenttigindegi (USAGM) arnaıy keńesshi Karı Leık málimdedi.

— Búgin men agenttiktiń Associated Press, Reuters jáne Agence France-Presse aqparat agenttikterimen kelisimsharttaryn buzý protsesin bastadym. Bul salyq tóleýshilerge shamamen 53 mıllıon dollar únemdeýge múmkindik beredi. Bizdiń agenttiktiń maqsaty — amerıkalyq tarıhty baıandaý. Bul jaýapkershilikti basqa bireýge júkteýdiń qajeti joq, — dep jazdy ol X áleýmettik jelisinde.

2022 jylǵy derekterge sáıkes, AQSh-ta 153,8 mıllıon salyq deklaratsııasy tapsyrylǵan. Demek, Leık qolǵa alǵan sharalar árbir salyq tóleýshige orta eseppen 34 tsent únemdeýge múmkindik beredi.

Donald Tramp aqpanda óz ákimshiligi Ilona Masktyń bastamalary nátıjesinde únemdelgen qarajattyń 20%-yn amerıkalyqtarǵa qaıtarý múmkindigin qarastyryp jatqanyn málimdegen bolatyn.

Buǵan deıin AQSh Memlekettik departamenti «mıssııa úshin asa mańyzdy emes» dep tanylǵan jańalyqtarǵa barlyq jazylymdy toqtatýǵa buıryq bergen. Al úkimet tıimdiligi departamenti (DOGE) únemdeý saıasaty aıasynda birneshe amerıkalyq BAQ-ty memlekettik qarjylandyrýdan ajyratyp otyr.