«AQSh basylymynyń boljamynda aqıqat bar ma?» - respýblıkalyq basylymdarǵa sholý
***
Qarjylyq baqylaý agenttigi taratylyp, onyń qyzmeti Ulttyq bankke berilgeli beri ártúrli pikirler aıtylýda. Osy máselege, qarjy salasyndaǵy basqa da túıtkil oılarǵa baılanysty Abaı atyndaǵy Ulttyq pedagogıkalyq ýnıversıteti qarjy kafedrasynyń meńgerýshisi, ekonomıka ǵylymdarynyń doktory, qarjyger Beısenbek Zııabekov «Aıqyn» gazetinde oqyrmanmen óz pikirin bólisken. «Bank júıesindegi daǵdarystyń negizgi syrtqy sebepteriniń biri retinde Ulttyq bank pen Qarjy naryǵy jáne qarjy uıymdaryn retteý jáne baqylaý jónindegi agenttik júrgizgen nesıe beretin uıymdardyń qyzmetin retteý saıasatynyń nashar bolǵanyn keltirýge bolady», - deıdi sarapshy. Bilikti maman pikirine qanyqqyńyz kelse, «Ulttyq bank pen Úkimet birlesip jumys isteýi tıis» degen maqalaǵa kóz júgirtińiz.
Jarǵaq qulaqtary jastyqqa tımeı, árkez «aıdy aspanǵa shyǵarýǵa» talpynyp júretin amerıkalyq jýrnalıster jýyrda taǵy bir qyzyqty derekterdi alǵa tartty. Bul joly áıgili «USA Today» gazetiniń tilshileri 2012 jyly Londonda ótetin jazǵy Olımpıada oıyndaryna boljam jasaǵan eken. Osy másele arqaý bolǵan maqala «Aıqyn» gazetinde «AQSh basylymynyń boljamynda aqıqat bar ma?» degen taqyryppen jarııalandy. «AQSh basylymynyń paıymdaýynsha, Qazaqstan quramasy Londonda 3 altyn medaldi ıelenedi. Ondaı qurmetke qos aýyr atlet - Svetlana Podobedova men Maııa Maneza jáne taekvondoshy Arman Shylmanov laıyq dep tanyldy», - dep jazady basylym. Baıraqty báseke qarsańyndaǵy boljammen tolyq tanysqyńyz kelse, gazettiń búgingi sanyn jiberip almańyz.
***
«Alash aınasy» gazetiniń turaqty «Dat!» aıdarynda tarıh ǵylymynyń kandıdaty Myrzahan Egamberdıevpen aradaǵy suhbat «Barlyq mektepter men joǵary oqý oryndaryna «túrki halyqtarynyń tarıhy» nemese «jalpy túrki tarıhy» páni engizilse durys bolar edi» degen taqyryppen basyldy. Basylym tilshisiniń barlyq saýaldaryna egjeı-tegjeıli jaýap bergen ol: «Dini bir, tili bir, mádenıeti men salt-dástúri bar túrki memleketteri Eýropa memleketteri ispetti mádenı-ıntegratsııalyq uıym qurǵany durys bolar edi. Bul birlikke jetý úshin de halyqtyń sanasyn ulttyq baǵytta damytqan abzal», - deıdi.
«Osyǵan deıin AQSh-tyń polıtseıleri Qazaqstan azamaty Kırıll Denıakındi atyp tastaǵany týraly aıtylǵan bolatyn. Qazirgi kúni Qazaqstannyń AQSh-taǵy elshiligi bul máseleniń egjeı-tegjeıin anyqtap jatyr», - dep jazady «Alash aınasy» gazeti. Basylymnyń atap ótýinshe, elimizdiń Syrtqy ister mınıstrligi atalǵan azamattyń jerlesimiz ekendigin rastap otyr. Qazirgi kúni QR SІM Qazaqstannyń Vashıngtondaǵy elshiligine máseleniń mán-jaıyn anyqtaýdy, quqyq qorǵaý organdarymen baılanysta bolýdy jáne eń bastysy, máıitti elge alyp kelýge kómektesýdi tapsyrǵan. Maqala «AQSh polıtsııasy Qazaqstan azamatyn atyp tastady» degen taqyryppen berilgen.
***
Elimizde fýtboldan jasóspirimder arasynda QR Prezıdentiniń kýbogy úshin halyqaralyq týrnır bastaldy. Osy jaıt arqaý bolǵan maqala «Astana aqshamy» gazetinde «Segiz komanda saıysqa kiristi» degen taqyryppen berilgen. Baslylymnyń atap ótýinshe, tórtinshi ret ótip jatqan dástúrli jarysqa segiz komanda qatysýda. Bir aptaǵa sozylatyn týrnır Astana-Arena stadıonynda ótýde. Utys qory 20 myń dollardy quraǵan Prezıdent kýbogy byltyrdan beri elordada ótip keledi.
***
«Kazahstanskaıa pravda» gazetiniń jazýynsha, Qazaqstan Prezıdenti Nursultan Nazarbaevtyń bastamasymen qurylǵan túrkitildes elderdiń Parlamenttik Assambleıasynyń qyzmeti, sondaı-aq túrki tildes memleketterdiń yntymaqtastyǵynyń mańyzdy aspektileri keshe assambleıa forýmyna qatysýǵa kelgen Ázirbaıjan Respýblıkasy Mıllı Medjlısiniń Tóraǵasy Oktaı Asadov jáne Túrkııa Respýblıkasy Uly Ulttyq jınalysynyń tóraǵasy Mehmet Álı Shahınmen QR Parlamenti Májilisiniń tóraǵasy Oral Muhamedjanovtyń arasyndaǵy kezdesýler barysynda qozǵaldy. Bul jaıynda basylymnyń beısenbilik sanyndaǵy «Rasshırıaıa dıalog tsıvılızatsıı» degen taqyryptaǵy maqalada keńinen baıandalǵan.
