AQSh arnaıy ókili bitimgershilik kelissózderi úshin Beırýtqa bardy

ASTANA. KAZINFORM — Aqúıdiń arnaıy ókili Amos Hokshteın seısenbi kúni lıvandyq «Hezbolla» toby men Izraıl arasyndaǵy bitimge kelý týraly kelissózder júrgizý úshin Beırýtke bardy. Onyń kelýine birneshe saǵat qalǵanda «Hezbolla» bitim jasaýǵa kelisti.

Amos Hokshteınniń Beırýtke seısenbi kúni barǵany týraly Lıvannyń NNA aqparat agenttigi habarlady.

AQSh pen Frantsııa Izraıl-Hezbolla soǵysynda atysty toqtatýǵa kúsh saldy. AQSh-tyń atysty toqtatý týraly jańa usynysy ótken aptada Lıvan parlamentiniń spıkeri Nabıh Berrıge jiberildi.

Nabıh Berrıdiń kómekshisi Álı Hasan Halıl Lıvan úkimeti men Hezbollanyń ótken aptada jazbasha túrde usynylǵan AQSh-tyń atysty toqtatý usynysyna keliskenin jáne onyń mazmunyna qatysty keıbir túsiniktemeler jasaǵanyn aıtty, dep habarlaıdy Reuters.

Dúısenbi kúni Lıvan AQSh-tyń Lıvandaǵy elshisine jazbasha jaýap joldady.

Hezbolla óziniń odaqtasy spıker Berrıdi atysty toqtatý týraly kelissózderde qoldady. Nabıh Berrı «Hezbolla» uıymynyń odaqtasy sanalatyn Lıvannyń taǵy bir shııt partııasy «Amaldyń» jetekshisi. Izraıl soqqylarynan Hebollanyń birqatar jetekshileri, sonyń ishinde onyń Bas hatshysy Hasan Nasralla qaza tapqannan keıin Berrı halyqaralyq qaýymdastyq pen Hezbolla toby arasynda deldal boldy.

Halıl bul bastamanyń sáttiligi Izraılge baılanysty ekenin aıtyp, eger Izraıl sheshimdi qalamasa, «100 problema týdyrýy múmkin» dedi.

Sonymen birge ol Izraıldiń Beırýt pen Hezbollanyń baqylaýyndaǵy ońtústik mańyndaǵy bombalaýlardyń kúsheıýine silteme jasaı otyryp, «ot astynda» kelissózder júrgizýge tyrysqanyn atap ótti.

Kelissózderden habardar dıplomattardyń aıtýynsha, kelissózder áli pysyqtalyp jatyr jáne sońǵy kelisimge kelý keshiktirilýi múmkin.

Eske salsaq, buǵan deıin «Hezbolla» Izraıl soqqysynan baspasóz hatshysynyń qaza tapqanyn rastaǵan bolatyn.