Aqsaıdaǵy uryp-soǵý deregi boıynsha qylmystyq is qozǵaldy

ORAL. QazAqparat - 8 qazan kúni shamamen saǵat 19.00-de Aqsaı qalasy 4-shaǵyn aýdanynda Temirjol kóshesi boıyndaǵy «Praga» kafesi janynda 1987 jylǵy K.Aıjumashevty uryp-soǵý oqıǵasy oryn aldy, dep habarlaıdy «QazAqparat» tilshisi.

BQO ІІD baspasóz qyzmetinen túsken málimetke qaraǵanda, atalǵan oqıǵa boıynsha áınektiń synyǵymen K.Aıjumashevqa dene jaraqatyn salǵan 1989 jylǵy A.Qajymov ustaldy. Qos bóksesi men sol jaq jilinshiginen kóptegen jaraqat alǵan jábirlenýshi sol kúni óziniń dostarymen Bórli aýdandyq ortalyq aýrýhanasyna jetkizilgen. Qazir ol emdelýde, jaǵdaıy qalypty. Sot-medıtsınalyq saraptama taǵaıyndaldy.

Aldyn ala málimet boıynsha A.Qajymov pen ony aıyrǵan adamdar jábirlenýshiniń dostary bolyp tabylady. Oqıǵa ózara kelispeýshilik saldarynan oryn alǵan. QR QK 293-babyna sáıkes (buzaqylyq) qylmystyq is qozǵalyp, tergeý amaldary júrgizilýde.