Aqsaqalǵa qol kóterý oqıǵasy boıynsha saraptama júrgizilip jatyr - Erlan Turǵymbaev
«Polıtsııa qyzmetkerine qol kóterý, jaǵasynan alý - Qazaqstanda ǵana emes, dúnıejúziniń qaı elinde bolmasyn qylmystyń úlkeni. Biz ony kórdik, sol qylmys jasaǵandar tabyldy ma? Olarǵa is qozǵaldy ma? Ekinshiden, qaı halyqta bolmasyn jasy úlken adamǵa, aqsaqalǵa qarsy sóz sóıleý, jaman sóz aıtý jaqsy emes. Bul másele áleýmettik jelide kóp talqylandy. Osy aqsaqalǵa (Qordaı aýdanynda) qol kótergen adamdar tabyldy ma? Tabylsa, olarǵa qatysty qylmystyq is qozǵaldy ma?», - dep surady Parlament Senaty Halyqaralyq qatynastar, qorǵanys jáne qaýipsizdik komıtetiniń tóraǵasy Muhtar Qul-Muhammed QR ІІM basshysynan.
Óz kezeginde E. Turǵymbaev búginde Qordaı aýdanynda jaǵdaı turaqty ekenin atap ótti.
«Bizdiń polıtsııa qyzmetkerlerine qol kótergen úsh adam anyqtalyp, qamaýǵa alyndy», - dep toqtaldy mınıstr.
Sonymen qatar ol aqsaqalǵa qol kóterý oqıǵasy boıynsha saraptalyq sharalar júrip jatqanyn aıtty.
«Aqsaqal boıynsha máselege toqtalsaq, bul iske qatysty azamatty ustadyq. Ol adam ekinshi kúni ustaldy, qazir qamaýda otyr. Atap aıtqanda, medıtsınalyq saraptama bitkennen keıin, isti eki-úsh aptadan soń sotqa jiberemiz», - dedi Erlan Turǵymbaev.
