Aqparattyq top Qarǵalyǵa bardy
Aýdan ortalyǵy Badamshada aýdan turǵyndarynyń qatysýymen jıyn ótti. Oblystyq kásipkerlik basqarmasy basshysynyń orynbasary Asqar Kókeev aqparattyq toptyń negizgi maqsatyn aıtty.
- Qazan aıynda respýblıkalyq top oblysta jeti baǵyt boıynsha jumys júrgizgenin kópshilik jaqsy biledi. Toptyń quramyndaǵy mamandar Aqtóbe qalasy men bes aýdanǵa bardy. Kóptegen máselelerdi sheshýge yqpal etti. Al repsýblıkalyq top barmaǵan óńirlerge oblys ákimdiginiń tapsyrmasy boıynsha oblystyq top attanyp otyr. Búgingi kúnge deıin Áıteke bı, Oıyl, Baıǵanın, Yrǵyz aýdandaryn araladyq. Maqsatymyz - halyqqa memlekettik baǵdarlamalar boıynsha aqparttyq kómek kórsetý, túsindirý jumysyn júrgizý.
Sondaı-aq jastarǵa trenıngter jáne selolyq okrýg ákimderiniń qatysýymen dóńgelek ústelder uıymdastyryp jatyrmyz. Osy kezge deıin túsindirý jumystaryna 2596 adam qatysty. Tórt aýdan boıynsha 424 jas oqydy, - dedi Asqar Kókeev.
Sondaı-aq jıynda «Agrarlyq nesıe korporatsııasy» AQ Aqtóbe fılıalynyń dırektory Dana Bekbaýova korporatsııanyń múmkindikterin tanystyrdy.
- Maqsat - elimizdegi agroónerkásip keshenin damytý, osy rette qoljetimdi nesıeleý júıesin jetildirý. Qazirgi kúni bul salany jandandyrý úshin memlekettik baǵdarlamalar iske asyrylyp jatyr, - degen fılıal dırektory «Altyn asyq», «Qulan» baǵdarlamalarynyń tıimdiligin aıtyp, turǵyndardyń saýaldaryna jaýap berdi. Aýdan ákiminiń orynbary Erlan Blıeev aýyl sharýalarynyń basyndaǵy problemalardy kóterdi.
- Aýyldaǵy kásipkerler qarjy ınstıtýttarynan aqsha alý arqyly mal satyp alyp, ony ósirip, kásibin dóńgeletýge yntaly. Qazirgi kúni osylaı sharýasyn damytyp otyrǵan azamattar bar. Alaıda olardyń kópshiligi qarjyny alyp, maldy satyp alýǵa kelgende veterınarlyq qaýipsizdikti saqtaý úshin kómekke zárý bolady. Sebebi olardyń barlyǵy zootehnık nemese mal dárigeri emes. Reseıden nemese shetelden mal ákelgisi keledi. Biraq maldy tekserip, naqty kómek beretin mamandar tappaıdy. Sebebi aýdannyń ózinde mal dárigeri jetkiliksiz. Olar kúndelikti atqaryp otyrǵan jumysyn tastap, kásipkerdiń sharýasyna kete almaıdy. Osyndaı qıyndyqtarǵa baılanysty keıbir sharýalardyń satyp alǵan malynan aýrý shyǵyp, qarjynyń jelge ushqan kezderi de bolǵan. Sondyqtan qarjy ınstıtýttary tarapynan bolsyn nemese ózge de baǵyttan bolsyn, sharýalarǵa veterınarlyq kómek kórsetilse, qarjy maqsatty jumsalar edi, - dedi aýdan ákiminiń orynbasary.
Dana Bekbaýova bul máseleniń oryndy ekenin, tıisti oryndarǵa jetkizetinin aıtty.
Sondaı-aq jıynda «Smeda» qoǵamdyq birlestiginiń basshysy Abaı Myrhın bıznesti bastaý jáne qarjyny tıimdi paıdalanýǵa qatysty keńes berdi. Osy baǵyttaǵy problemalardy ortaǵa saldy.
- Bıznesti bastaımyn degen adamǵa qazir múmkindik mol. Biraq bizdiń azamattardyń kópshiligi jeńil paıda tapqysy keledi. Aýdandardy aralaǵanda baıqaǵanym, shaǵyn kásip ashqysy keletinder úlken kólemdegi qarjyny suraıdy. Esepteı kele ol iske sol qarjynyń jartysy ǵana jumsalatynyn anyqtaımyz. Al qalǵan qarjyny ne maqsatta paıdalanbaqsyz degen suraqqa toı jasaý nemese úı salýǵa jumsaǵysy keletinin aıtady. Sondyqtan azamattar naqty josparmen kelgeni jón, - dedi Abaı Myrhın.
Jıynda oblystyq tutynýshylardyń quqyǵyn qorǵaý departamentiniń bólim basshysy Jeksenbaı Knıazov, oblystyq prokýratýranyń aǵa prokýrory Jumabek Іzǵalıev, «Aýyl sharýashylyǵyn qarjylaı qoldaý qory» AQ Aqtóbe fılıalynyń nesıe menedjeri Serik Nıetov aýyl azamattarynyń suraqtaryna jaýap berdi. Onyń ishinde negizinen nesıe alý, sýbsıdııa, kepilge zat qoıý sekildi máseleler jıi kóterildi.
Іlgeride Herson, keıingi jyldary Aqjaıyq atanǵan aýyldyń turǵyny, mal sharýashylyǵymen aınalysatyn Ǵanı Muhambetov jol boıynan kempıng ashqysy keletinin aıtyp, keńes surady.
- Aqtóbe - Orsk tasjolynyń boıynan, ıaǵnı Aqtóbe, Hromtaý, Orsk jolynyń qıylysatyn tusynan kempıng ashsam degen josparym bar. Bul mańda qysy-jazy kólik aǵylyp jatady. Keler jyly tasjol jóndelse, tipti kóbeıedi. Alaıda bul aımaqta jolaýshylardyń tynyǵatyn, kólikterin jóndeıtin arnaıy oryn joq. Osy máseleni qolǵa almaq bolyp, surastyra kelgende ol jerdiń ıesi bar ekenin estidim. Eger tıisti oryndar máseleni sheship, jer berse, nesıe alýǵa jaǵdaı jasasa, osy kásipti ıgerip áketer edim, - dedi Ǵanı Muhanbetov.
Kásipkerdiń suraǵyn muqııat tyńdaǵan tıisti oryn ókilderi nesıe alýdyń, bıznes jospar qurýdyń joldaryn túsindirdi. Aýdan ákimdigi jer alyp berýdiń jolyn qarastyratyn boldy. «Damý» kásipkerlikti damytý qory oblystyq fılıalynyń bas menedjeri Álibı Sabyr bul rette memlekettik baǵdarlamalardyń múmkindigin usyndy.
- «Bıznestiń jol kartasy - 2020» baǵdarlamasy boıynsha kez kelgen kásipke nesıe alýǵa bolady. «Damý qory» ekinshi deıgeıli bank arqyly kómek kórsetedi. Nesıe 19 paıyzdyq ústememen beriledi. Onyń 10 paıyzyn memleket, qalǵanyn kásipkerdiń ózi tóleıdi. Eger siz bankke barǵanda kepilge zatyńyz jetpese, qor sizge kepildik beredi. Іsin jańadan bastaǵan kásipkerlerge 85 paıyzǵa deıin kepildik beriledi. 20 mıllıon teńgege deıin nese alýǵa bolady. Sondaı-aq óńirlik baǵdarlamalarǵa da qatysýǵa bolady. Qazirgi kúni aımaqtyq «Jas start Aqtóbe» jáne «Keń dala» baǵdarlamasy jumys istep jatyr. Bul eki baǵyt boıynsha nesıe 8,3 paıyzben beriledi. Sonymen qatar oblystyq bıýdjetten qaıtarymsyz túrde beriletin grant bar. Eger bul aýylda joq, ıaǵnı ınnovatsııalyq jobalar bolsa, kásipker 3 mıllıon teńgege deıingi qarjyny qaıtarymsyz túrde ala alady. Jalpy bızneske qatysty qandaı da bir saýaldaryńyz bolsa, «Damý» qoryndaǵy mamandar tegin keńes berip, bıznes jospar qurýǵa kómektesedi, - dedi Álibı Sabyr.
Jıynda sharýalardyń tarapynan túrli suraqtar qoıyldy. Keıbireýleriniń máselesi sol jerde sheshildi. Tipti osy jıynda bir-birimen tanysyp, seriktes retinde jumys isteýge kelisim jasaǵan turǵyndar da boldy. Aýdan ortalyǵyndaǵy kásipker Mádına Ysqaqova isin endi bastaǵaly turǵan Gúljaınar Batyrbaevaǵa óziniń tigin sheberhanasyn úsh aıǵa deıin aqy tólemeı jalǵa alýǵa kelisim berdi.
Tústen keıin memlekettik jáne jekemenshik seriktestikke qatysty jıyn ótti. Bul basqosýda aýdandaǵy tıisti oryndarǵa mamandar keńes berdi. Aýdanda atqarylatyn sharýalar ortaǵa salyndy. Bıylǵy jyly aýdan boıynsha úsh joba qolǵa alynǵan. ıAǵnı Qosestek jáne Shámshi Qaldaıaqov aýyldaryna klýb salynsa, aýdan ortalyǵynan elý oryndyq balabaqsha boı kótermek. Qazirgi kúni eki klýbtyń jobalyq qujattary daıyn. Al balabaqshaǵa jer bólinip, tıisti qujattar ázirlenip jatyr.
Sondaı-aq selolyq okrýg ákimderine arnalyp dóńgelek ústel uıymdastyryldy. Aqparattyq top músheleri óz salalary boıynsha okrýg ákimderine keńes berdi.
Bul kúni aýdan ortalyǵyndaǵy kásiptik kolledjde jastarǵa arnap trenıng ótti.
Erteńine aqparattyq top aýdannyń Álimbet, Petropavlovka aýyldaryn aralady.
