Aqpan qan tapsyrý aıy dep jarııalandy

ASTANA. KAZINFORM – Jalpyulttyq áleýmettik bastamalardy qoldaý aıasynda Densaýlyq saqtaý mınıstri Aqmaral Álnazarova aqpan aıyn – óteýsiz qan donorlyǵy aıy dep jarııalady. 

Bul bastama erikti, óteýsiz donorlyq mádenıetin damytýǵa, sondaı-aq qoǵamdaǵy jaýapkershilik, ózara kómek jáne gýmanızm qundylyqtaryn nyǵaıtýǵa baǵyttalǵan.

Qan donorlyǵy — bul jaı ǵana bir rettik aktsııa emes, ómirdi qutqarýǵa, densaýlyq saqtaý júıesin qoldaýǵa baǵyttalǵan, sondaı-aq erikti túrde qatysý, janashyrlyq pen jaýapkershilik sııaqty asyl qundylyqtarǵa negizdelgen turaqty qoǵamdyq qozǵalys.

— «Taza Qazaqstan» aktsııasy — bul tek qorshaǵan ortanyń tazalyǵy ǵana emes, sonymen qatar árbir azamattyń júrek tazalyǵy, jaýapkershilik sezimi men qoǵam ıgiligi úshin qosqan úlesi. Erikti qan donorlyǵy osy qundylyqtarmen tolyq úndesedi, — dep atap ótti mınıstr.

Aqpan aıynda elimizdiń barlyq óńirinde aqparattyq-túsindirý sharalary, taqyryptyq aktsııalar, donorlarmen jáne seriktestermen kezdesýler uıymdastyrylyp, qan ortalyqtarynda arnaıy baǵdarlamalar ótkizý josparlanyp otyr. Bul is-sharalarda jastardy tartýǵa erekshe kóńil bólinbek.

Osy aktsııa aıasynda kez kelgen azamat jaqsylyq jasaýǵa nıet bildirip, óz óńirindegi qan ortalyǵyna baryp, erikti túrde qan tapsyra alady.

Búgin Densaýlyq saqtaý mınıstri elordalyq qan ortalyǵynda donor bolyp, donorlyq qozǵalystyń mańyzdylyǵyn jeke úlgisi arqyly kórsetti.

Qazaqstanda jyl saıyn 180 myńnan astam azamat donor atanyp, olar jalpy alǵanda qan men onyń komponentterin 250 myńnan astam ret tapsyrady.

Jyl saıyn 80 myńnan astam patsıentke qan komponentteri quıylady, al jalpy transfýzııalar sany jylyna shamamen 400 myńǵa jetedi.

Aıta ketelik Kókshetaýda polıtseı 20 lıtr qan tapsyrǵany týraly jazǵan edik.