Aqnár Gúlstannyń ólimine qatysty isti UQK tergep jatyr

ASTANA. KAZINFORM – 22 jastaǵy stýdent Aqnár Gúlstannyń ólimine qatysty isti Qazaqstan Respýblıkasynyń Ulttyq qaýipsizdik komıteti tergep jatyr.

«Kórsetilgen fakti boıynsha sotqa deıingi tergep-tekserý júrgizilýde. QR Qylmystyq-protsestik kodeksiniń 201-baby 1-bóligine sáıkes ózge aqparat jarııa etilýge jatpaıdy», – dep habarlady UQK redaktsııanyń resmı saýalyna bergen jaýabynda.

Vedomstvo tergeý qandaı bap boıynsha júrgizilip jatqanyn naqtylaǵan joq.

Eske salaıyq, 2024 jylǵy 20 shildede Almatyda 22 jastaǵy stýdent Aqnár Gúlstan qaza tapqan edi. Tergeý nusqasy boıynsha ol turǵyn úı kesheniniń jetinshi qabatyndaǵy páter terezesinen qulaǵan.

Alaıda marqumnyń anasy Gúlstan Hamıt qyzynyń ózine qol jumsaýy múmkin emestigin aıtyp, onyń ózge adamdardyń zorlyq-zombylyǵy saldarynan qaza tapqanyn málimdegen. Ol ádil tergeý júrgizýdi talap etken bolatyn.

Bul oqıǵa qoǵamda keń rezonans týdyrǵan edi. Buǵan deıin Almaty qalalyq polıtsııa departamenti bul fakt boıynsha qylmystyq is qozǵalyp, kýágerlerden jaýap alynyp, beınejazbalar zerttelip jatqanyn habarlaǵan bolatyn.

Keıinirek ishki ister mınıstriniń orynbasary Sanjar Ádilov jábirlenýshi taraptyń barlyq ýájderi tolyq kólemde tekserilip, beınematerıaldarǵa arnaıy saraptama taǵaıyndalǵanyn atap ótken.