Aqmolalyqtar Naýryz meıramyn erekshe toılap jatyr
Arqanyń aq tańymen ilesken aqmolalyqtar oblys ortalyǵyndaǵy Abylaı han jáne Táýelsizdik alańyndaryna jınalyp, Naýryz meıramyn «Kókshe óńiri sal serileri», «Qut darǵan kıeli meken» merekelik teatrlandyrylǵan qoıylymmen qarsy aldy. Bul kúni alańǵa 10-ǵa jýyq kıiz úı tigilip, merekeni tamashalaýǵa kelgen kókshetaýlyqtar men meımandarǵa Naýryz kóje, baýyrsaq tárizdi ulttyq taǵamdar usynylyp, tegin taratyldy. «Kórisý», «Betashar» tárizdi ulttyq salt-dástúrleri men «Batyrlar shaıqasy» sporttyq oıyndary da kórermenderge usynyldy.
Merekelik sharaǵa qatysqan aımaq basshysy Ermek Marjyqpaev quttyqtaý sóz sóılep, jınalǵan halyqqa júrekjardy tilegin arnady.
«Ǵasyrlar tarıhyna qaramastan, Naýryz meıramy halyq jadynda saqtalyp, memleketimizdiń kópten kútken Táýelsizdigimen birge elimizge oraldy. Búgin ony 32-ret atap ótip, biz qaıta jandanǵan Naýryzdyń tarıhy - elimizdiń táýelsizdiginiń tarıhy dep senimdi túrde aıta alamyz», - dep atap ótti aımaq basshysy Ermek Marjyqpaev.
Kóshpeli órkenıet festıvali aıasynda Abylaı han alańnyń perımetri boıynsha ornalasqan «Kóne dáýir mádenıeti», «Bylǵary men teri», «Quraq-kórpe», «Kúmis áshekeıler», «Ulttyq kıimder», «Ulttyq buıymdar», «Ulttyq óner», «Salt-dástúrler», «Ulttyq qundylyqtar» jáne kitap taqyryptar negizindegi 10 kıiz úı qalashyǵy merekeniń kórkin odan saıyn qyzdyra tústi. Olardyń árqaısysynda qala turǵyndary men qonaqtary ulttyq buıymdardan jasalǵan kórmelerdi kórip, ulttyq taǵamdardan dám tata aldy.
Mundaǵy festıvaldiń ıdeıasy -túrkilerdiń baı mádenıetin, halyqtyń baı tarıhyn kórsetý, óskeleń urpaqqa salt-dástúrler men ádet-ǵurypty dáripteý, patrıotızmdi qalyptastyrý.
Ásirese, Q.Kúmisbekov atyndaǵy halyq aspaptar orkestriniń, Úkili Ybyraı atyndaǵy Aqmola oblystyq fılarmonııasynyń, «Kókshetaý» jáne «Dostar» mádenıet saraıy ánshileri men oblystyń ár shalǵaıynan kelgen kórkemónerpazdar ujymdary merekeni ásem ánmen árlendirip, kúmis kúımen, myń buralǵan bımen túrlendirip, kópshilik kóńilin shalqyta tústi.
Sonymen birge merekelik sharaǵa jınalǵan jurtshylyqqa naýryz kóje, qurt, baýyrsaq, sondaı-aq 1000-nan astam qyzǵaldaq gúli úlestirildi.
Shara oblys ortalyǵynyń «Jaılaý», «Saryarqa», «Birlik», «Avtoqalashyq» shaǵyn aýdandarynda «Naýryz meıramy – Uly dalanyń ulaǵaty» kóshpeli kontserttik baǵdarlamasyna ulasty.
Aıta ketsek, Aqmolada Naýryz meıramyn merekeleý aıasynda 1000-nan astam is-shara ótedi.
