Aqmolalyq velosıpedshi álem chempıonatynda júldeli oryn ıelendi

KÓKShETAÝ. QazAqparat - Aqmolalyq sportshy Andreı Chýgaı Qazaqstan tarıhynda velosport boıynsha ótken álem chempıonatynda sprıntten júldeli oryndy ıelendi, dep habarlaıdy QazAqparat tilshisi.

Shveıtsarııanyń Egl qalasynda velosport boıynsha trekte álem chempıonaty ótip jatyr. Jasóspirimder arasyndaǵy baıraqty jarysqa kókshetaýlyq 18 jastaǵy Andreı Chýgaı qatysyp, baǵyn synady. Aqmola oblystyq olımpıada rezerviniń №7 balalar men jasóspirimder mamandandyrylǵan sport mektebiniń tálimgeri Ivan Grınberg jattyqtyratyn Andreı Chýgaı otandyq velosportta aıtýly jeńiske qol jetkizdi.

Qazaqstannyń velosport tarıhynda sprıntten  (jaqyn qashyqtyqqa jarysý)  júldeli orynnan kórinýi alǵash ret tirkelip otyr.«Jarys óte aýyr boldy» deıdi velosıped sporty boıynsha olımpıadalyq daıyndyq ortalyǵynyń aǵa jattyqtyrýshysy Ivan Sıvash.

«Jarysqa 45 velosıpedshi qatysty. Alǵashynda Andreı irikteý jarysynda tómen nátıje kórsetse, keıin «úmit jarysynda» jartylaı fınalǵa shyqty. Básekelestik óte joǵary boldy. Úshinshi oryn úshin úsh sportshy talasty. Abyroı bolyp, Andreı márege úshinshi bolyp keldi»,-deıdi jattyqtyrýshy.

Jattyqtyrýshynyń aıtýynsha, álem chempıonatyna daıyndyq naýryz aıynan bastaldy.

«Tórt halyqaralyq jarysqa qatystyq. ıAǵnı, Astana, Qyrǵyzstanda jáne ózimizdiń velotrekte ótken jarystarda sportshylarymyzdyń sheberlikteri shyńdaldy. Búgin sonyń nátıjesin kórip otyrmyz», - dep tolyqtyrdy Ivan Sıvash.