Aqmolalyq óz qarjysyna aýyl mektebin jóndep berdi
1982 jyly qyrkúıek aıynda «Maksımov» keńsharynyń dırektory bolyp taǵaıyndalǵan kezden beri Aleksandr Zakýsılov óziniń eńbek jáne ómir jolyn osy sharýashylyqpen baılanystyryp keledi. Keńes zamanynda keńshardy talaı jetistikterge jetkizgen ol naryqqa kóshkennen keıin menshik túri ózgerip, «Maksımov» jaýapkershiligi shekteýli seriktestigi atanǵan sharýashylyqty ótpeli kezeńniń aýyrtpalyqtarynan da aman alyp shyqty. Maksımov aýylynyń turǵyndary basqalar sııaqty ótpeli kezeńniń qıyndyqtaryn qatty sezine qoıǵan joq. Jurtshylyq ózderiniń bar paılaryn túgel osy sharýashylyqtyń ystyǵyna kúıip, sýyǵyna tońyp, bar jumysyn atqaryp júrgen dırektordyń qolyna senip tapsyrdy. Aleksandr Aleksandrovıch te sol kópshiliktiń ózine kórsetken senimin aqtaý úshin aıanyp qalmady. Buryn da keńshar jumysy úshin kúıip-janyp júretin basshy endi tipti, kúndiz kúlki, túnde uıqyny umytty.
Búginde «Svobodnoe» atalatyn bul jaýapkershiligi shekteýli seriktestik jaıqaltyp egin egip, myńǵyrtyp mal ósirip otyrǵan Sandyqtaý aýdanyndaǵy eń irgeli sharýashylyqtardyń biri. Topyraqty qorǵaý jáne ylǵaldy únemdeý tehnologııasyn engizgen sharýashylyq aýa raıy jaǵdaıyna qaramaı, jyl saıyn joǵary ónim alýda. Serikestik aýyl sharýashylyǵy naýqandaryn belgilengen merzimde sapaly oryndaýǵa erekshe nazar aýdarady. Tuqym sebý, egindi dárileý, egin jınaý, súdiger kóterý, qysqa qar toqtatý sııaqty birinen soń biri kezektese keletin naýqandardy túgel sapaly atqaratyn sharýashylyqtyń egisi bitik, ónimi de mol. Osyǵan oraı, tabys ta joǵary. Tabys kóp bolǵan soń jańa tehnıka alyp, mashına-traktor parkin qazirgi zamanǵy ónimdiligi joǵary tehnıkalarmen jańartýǵa da múmkindik bar. Búginde sharýashylyqtyń egis alqabynda shet eldik kombaındar men aýyl sharýashylyǵy keshenderin jıi kórýge bolady.
Uzaq jyldar sharýashylyq basshysy bolyp kele jatqan Aleksandr Aleksandrovıch basty baılyq adam ekendigin eshqashan esten shyǵarǵan emes. Sondyqtan da, seriktestikte eń aldymen eńbekshilerge jaǵdaı jasaý basty nazarda. Sońǵy jyldarda turaqty túrde joǵary ónim alyp kele jatqan seriktestik dıqandarynyń tabysy da osyǵan oraı jyl saıyn arta túsýde. Sol sebepti mektep bitirgen jastardyń basym kópshiligi aýylda qalyp, eńbek etedi. Onyń uly Aleksandr da áke jolyn qýyp, taǵdyryn jermen baılanystyrdy. Qazir ol «Maksımov» jaýapkershiligi shekteýli seriktestigin basqarady. Ákeli-balaly Zakýsılovtardyń esimi búginde aýdan ǵana emes, oblysqa jaqsy tanymal. Sharýasy órge domalaǵan eki birdeı seriktestik aýyl turǵyndaryn jumyspen tolyq qamtamasyz etip otyr.
Oǵan qosa, aýyldaǵy bilim, densaýlyq saqtaý, mádenıet nysandaryn da qamqorlyqqa alǵan. Seriktestik óz qarjysyna aýyldaǵy sý júıesin jóndeýdi de moınyna aldy. Jas mamandar úshin seriktestik tórt páterli úsh úı salyp berdi. Qarapaıym halyq úshin jasalyp jatqan osy sharýalardyń bári de búginde óz nátıjesin anyq kórsetip otyr. Sońǵy on jylda aýyldan basqa jaqqa bir de bir otbasy kóshpegen, kerisinshe syrttan kelip jatqandar bar.
Bıyl «Svobodnoe» mekemesi óz qarjysy esebinen Vladımırskıı orta mektebine kúrdeli jóndeý jumystaryn júrgizý úshin 101,8 mıllıon qarjy bólip otyr. Bul qarjyǵa «GAAK-NS» JShS bilim ordasynyń shatyry men qabyrǵalaryn jóndep, eden, esik, terezelerin aýystyrýda.
«Oǵan qosa, jeldetkish, kanalızatsııa, sý qubyry jáne elektr júıesi tolyqtaı jańartylýda. Mekteptiń janynda qańyrap qalǵan ǵımarat ta qalpyna keltiriletin bolady. Mekteptiń ǵımaratynda ornalasqan qazandyq syrtqa shyǵarylady jáne abattandyrý jumystary qolǵa alynady. Jalpy, kúrdeli jóndeý jumystary qazan aıyna deıin tolyq aıaqtalyp, oqýshylardyń alańsyz bilim alýyna barlyq jaǵdaı jasalynatyn bolady», - deıdi Aleksandr Zakýsılovtyń úlkeni.
Bıyl da ákeli-balaly Zakýsılovtardyń basqarǵan sharýashylyqtary egin ósirýdiń joǵary mádenıetin saqtaýdyń arqasynda jyldaǵydaı jaqsy ónim jınaýdy josparlap otyr.
Aıta keteıik, «Svobodnoe» JShS-i 14132 gektar, «Maksımov» seriktestigi 5185 gektar alqapqa dándi daqyl tuqymyn sińirgen edi. Shet eldik ónimdiligi joǵary tehnıkalardy jumyldyra otyryp, eki sharýashylyq dıqandary qysqa merzim ishinde astyqty ysyrapsyz jınap alamyz dep otyr. Ótken jyly da atalmysh sharýashylyqtardyń ónimi kútkendegideı mol boldy. Qazir tehnıkany aldaǵy qońyr kúzdegi egin oraǵy naýqanyna daıyndaý jumystary júrgizilýde.
