Aqmolalyqtyń 2 mln aqshasyn jymqyrǵan taǵy bir dropper qolǵa tústi

KÓKShETAÝ. KAZINFORM - Aqmolalyqtyń 2 mln aqshasyn jymqyrǵan taǵy bir dropper qolǵa tústi, polıtsııa is qozǵady.

Aqmola oblysy PD baspasóz qyzmetiniń málimetinshe, 23 jastaǵy kúdiktini Astana qalasynda «Alaıaqty toqtataıyq» jedel-profılaktıkalyq is-sharasy aıasynda Tselınograd aýdandyq polıtsııa bóliminiń qyzmetkerleri qolǵa túsirgen.

«Tergeýshiler er adamnyń ınternet-alaıaqtyq deregine qatysy bar ekenin anyqtady, odan Qoıandy aýylynyń turǵyny zardap shekken. Aýyl turǵyny 2 mln teńge nesıe rásimdep, onyń alaıaqtyń esep-shotyna aýdarǵan», - dedi vedomstvodan.

Dropperdiń túsiniktemesi boıynsha, ol ońaı aqsha tabý týraly usynysty «Tık Tok» qosymshasynan kezdestirgen. Paıdalanýshylardyń biri oǵan aqsha qarajatyn krıptovalıýtaǵa aýdarý arqyly aqsha tabýdy usynǵan. Usynys stýdentti qyzyqtyrǵan jáne ol avtormen baılanysqa shyqqan. Osylaısha, búkil alaıaqtyq júıeniń qatysýshysy bolyp shyǵa keldi. Kýratorlarynyń nusqaýy boıynsha jas jigit Halyk Bank, ForteBank, HomeKredit Bank, Eurasian Bank, Center Credit jáne Simply bankterinde kartochkalyq shottar ashty. Keıinirek bul shottarǵa aqsha túse bastaǵan, ony ol AQSh dollaryna aýystyryp, basqa shottarǵa jibergen jáne ózine belgili bir paıyz qaldyryp otyrǵan.

«Qazirgi kezde, qansha adam alaıaqtan aldanǵanyn jáne onyń esep-shotyna qansha aqsha aýdarǵany anyqtalyp jatyr», - dep qosty vedomstvodan.

Aıta ketsek, budan buryn kókshetaýlyqtyń 12 mln teńge aqshasyn jymqyrǵan dropper 3,5 jylǵa sottalǵanyn jazǵan edik.