Aqmolalyqtar tsıfrlyq sot oryndaýshysynyń arqasynda 82 mln teńgelerin únemdedi
ASTANA. KAZINFORM — Ótken jyly aqmolalyqtar tsıfrlyq sot oryndaýshysynyń arqasynda 82 mln teńgege jýyq qarajattaryn únemdedi.
Bul týraly Aqmola oblystyq ádilet basqarmasynyń basshysy Baýken Álmesh aıtty.
— Mańyzdy jetistikterdiń biri — «sot oryndaýshysy robotyn» engizý. Máselen, 20 aılyq eseptik kórsetkishke deıingi ákimshilik aıyppuldar ýaqytyly tólenbegen jaǵdaıda ýákiletti organ málimetterdi jeke sot oryndaýshysynyń qatysýynsyz is júrgizýdi qozǵaıtyn robot sot oryndaýshysyna beredi. Іs qozǵalǵannan keıin azamattar ol týraly egjeı-tegjeıli aqparaty bar EGov Mobile-da 1414-ten SMS habarlama jáne push-habarlama alady. Sol arqyly azamattar aıyppul somasynyń 25 paıyzyn qosymsha tóleýden jáne sot oryndaýshysyna barýdan bosatylady. Óıtkeni barlyq áreketter onlaın rejıminde júrgiziledi, — dedi Baýken Álmesh.
Onyń dereginshe, tsıfrlyq sot oryndaýshysy iske qosylǵan sátten bastap búgingi kúnge deıin jalpy 2,2 mlrd teńgeni quraıtyn 109 myńnan astam atqarýshylyq is qozǵaldy. Aqmolalyqtar 550 mln teńge qarajatttaryn únemdedi.
— Ótken jyly Aqmola oblysy boıynsha 327 941 466 teńge somasyna 16 999 jeńildetilgen atqarýshylyq is júrgizý qozǵaldy, onyń ishinde 63 568 646 teńge somasyna 3 378 atqarýshylyq is júrgizý aıaqtaldy. Oblys turǵyndary jeke sot oryndaýshylarynyń qyzmetine aqy tóleýdi boldyrmaý esebinen 81 985 367 teńge únemdedi, — dedi ol.
Baýken Álmeshtiń atap ótýinshe, 2025 jyly adamdardyń ómirin tsıfrlyq dáýirde jeńildetý jáne yńǵaıly etý, sondaı-aq ýaqyt pen aqshany únemdeý úshin ádilet organdarynyń jumysyn jaqsartý josparlanǵan.
— Atap aıtqanda, «Áıteke» kómekshisi — qarapaıym zańgerlik konsýltatsııalar men qujattardy jınaýǵa kómektesýge arnalǵan chat-bot iske qosylady. Robot-sot oryndaýshysynyń quzyreti keńeıtiledi. Ol aınalysatyn bereshek mólsheriniń shegi 20-dan 40 AEK-ke deıin ósedi. Bul azamattardy jylyna 12,2 mlrd teńgege deıin qarajatyn únemdeıdi. Atalǵan quraldar táýliktiń kez kelgen ýaqytynda paıdalanýǵa múmkindik bere otyryp, qarapaıymdylyǵymen, jedeldigimen jáne qoljetimdiligimen erekshelenetin bolady. Qabyldanǵan sharalar azamattardyń quqyqtyq saýattylyq jónindegi sanasyn nyǵaıtýǵa jáne olardyń quqyqtary men mindetterin túsinýdi jaqsartýǵa yqpal etedi. Qyzmetterdi ońaılatý jónindegi jumystardyń nátıjesinde qazaqstandyqtar ýaqyt pen aqshany únemdeıdi. Osy qyzmetterdi alýda qoljetimdilik pen yńǵaılylyq artady. Sondaı-aq ákimshilik kedergiler azaıady, bul protsesti neǵurlym ashyq jáne tıimdi qylady, — dedi basqarma basshysy.
Buǵan deıin habarlanǵandaı, dál osyndaı robot sot oryndaýshylar Jetisý oblysynda da jumys isteıtini belgili boldy.