Aqmolalyqtar Qazaqstan halqynyń birligi kúnin keńinen atap ótti
KÓKShETAÝ. KAZINFORM — Búgin Abylaıhan alańy naǵyz dostyq pen birliktiń sımvolyna aınaldy.
Ulttyq kıim kıgen kópshilik, kókke jelbiregen túrli tústi týlar, jandy mýzyka men kúmbirlegen kúı – bári de eldegi etnostar arasyndaǵy jarasymdy ómirdiń kórinisi ispetti. Bul – Kókshetaý turǵyndary men qala qonaqtary Qazaqstan halqynyń birligi kúnin keń kólemde atap ótkeniniń dáleli.
Bul jaı ǵana mereke emes. Bul tatýlyq pen ózara túsinistiktiń, ártúrli mádenıettiń bir arnada toǵysyp, birtutas el bola alǵanynnyń aıǵaǵy. Merekege kelgen ár adamnyń júzinen qýanysh pen maqtanysh sezimi baıqaldy. Merekelik is-shara barysynda Aqmola oblysy ákiminiń orynbasary Dosulan Aıtbaev barsha jurtty aıtýly kúnmen quttyqtap, birlik pen yntymaqtyń el damýyndaǵy mańyzyna toqtaldy.
– Ulttyq birlik – baǵa jetpes baılyǵymyz, memlekettigimizdiń berik irgetasy. Búgingi mereke elimizdegi kópultty qoǵamnyń birtutastyǵyn pash etetin, ortaq murattarǵa degen adaldyqty aıqyndaıtyn erekshe kún. Biz bárimiz bir shańyraqtyń, bir taǵdyrdyń, bir bolashaqtyń adamymyz, – dedi ákim orynbasary.
Іs shara barysynda «Birlik» sporttyq jarysynyń qatysýshylary alańǵa saltanatty túrde kirip, kórermenderge erekshe áser syılady. Etnomádenı ortalyqtardyń ókilderi, stýdentter, oqýshylar jáne qoǵam belsendileri qatysqan bul shara el ishindegi dostyq pen ózara qurmettiń naqty kórinisi boldy.
Saltanatty jıyn barysynda el birligin nyǵaıtýǵa úles qosyp júrgen birqatar aqmolalyq azamat arnaıy marapattar men mereıtoılyq tósbelgilerge ıe boldy. Solardyń biri – qoǵam qaıratkeri, Qazaqstan halqy Aqmola assambleıasynyń ardageri Meırambek Qıyqov.
– Bul marapat men úshin úlken jaýapkershilik. Eńbegimdi elegen el azamattaryna alǵysym sheksiz. Qazaq tili men mádenıetin dáripteý, eldiń tatýlyǵyn saqtaý árbirimizdiń azamattyq paryzymyz, – dedi ardager tolqynyspen.
Merekelik is-sharada túrli ult ókilderiniń áni men bıi kórermenderdi tánti etti. «Gákký», «Kókshetaý», «Sývenır», «Qazyna» syndy halyqtyq ansamblder men óner ujymdarynyń óneri arqyly elimizdiń baı mádenı kelbeti aıqyn kórindi. Merekelik kóńil kúıge bólengen qala turǵyndary da ishtegi tolqynys pen qýanyshty jasyrmady.
– Bul merekede tek án-kúı emes, adamdar arasyndaǵy shynaıy jylylyq seziledi. Ár ult óz ónerin pash etip, bir-birin qurmetpen qarsy alady. Naǵyz dostyq osyndaı bolady, – deıdi qala turǵyny.
Merekeniń ereksheligi – bıyl Qazaqstan halqy Assambleıasynyń 30 jyldyǵymen tuspa-tus kelýi. Bul tarıhı qurylymnyń el birligin saqtaýdaǵy orny erekshe ekenin kópshilik taǵy bir márte sezindi.
Shara sońynda barlyq ónerpaz ben júrgizýshiler sahna tórine shyǵyp, «Qazaqstan – altyn uıam, besigim» ánin oryndady. Kók týdyń astynda toǵysqan san ult ókili bir daýyspen bolashaqqa degen úmitin, elge degen súıispenshiligin jetkizdi.
Aıta keteıik, búginde Aqmola oblysynda 48 etnomádenı birlestik jumys isteıdi. Olar 100-ge jýyq etnos ókilderiniń ózara tatýlyǵyn nyǵaıtyp, ortaq múdde jolynda eńbek etip jatyr.
Aıta keteıik, Aqmola oblysynda zańsyz berilgen jer ýchaskesi qaıtaryldy.