Aqmolalyq oqýshynyń aqyldy aıaldama jobasyn ákimdik is júzinde júzege asyrmaqshy
KÓKShETAÝ. KAZINFORM – Aqmola oblysynyń Şýche qalalyq mektep-lıtseıiniń 10-synyp oqýshysy Sulýhan Amangeldi aqyldy aıaldama jobasyn ázirledi. Qala basshylyǵy bul jobany is júzinde júzege asyrmaqshy.
Ustazdarynyń aıtýynsha, Sulýhan bul jobany ázirleýdi bir jarym jyl buryn bastaǵan.
«Qalamyzda halyq sanynyń artýy, jeke kólikterdiń jáne avtobýstardyń kóbeıýi turǵyndardyń qatynap turýyna yńǵaısyzdyq týǵyzýda. Buǵan qalamyzdaǵy aıaldamalardyń jaısyzdyǵy da keri áser etip otyr. Osy máseleni sheshý úshin oqýshymyz Sulýhan Amangeldi aqyldy aıaldama jobasyn ázirledi. Ol bul jobamen 1, 5 jyl aınalysty. Jobada kórsetilgendeı, aqyly aıaldama jolaýshylarǵa qolaıly jaǵdaı jasap qana qoımady, qoǵamdyq kólikti kútý ýaqytyn qysqartýǵa múmkindik beredi», - deıdi joba jetekshisi, ınformatıka pániniń muǵalimi Ásel Gabdýllına.
Oqýshy jobany qolǵa almas buryn shet elderdiń tájirıbesin zerttegen.
«Bundaı aıaldamalar AQSh, Nıderlandy elderinde qarqyndy damyp kele jatyr. Bizde ony jerilikti aýa raıyna beıimdeý ǵana qajet. Aıaldamada sensorly avtobýstar kartasy, avtobýstardy baqylaıtyn GPS datchıkter, avtobýs kútý kezinde ýaqytty tıimdi paıdalaný úshin onlaın kitaptar usynylǵan. Kofe mashına, telefon qýattaǵysh rozetkalar, beıne-kameralar jáne avtomatty túrde qosylatyn kondıtsıoner bolady. Bunyń barlyǵy kishi bısneske de úlken kómek. Qarjylyq jaǵynan ózin-ózi aqtaıdy. Sonymen birge joba múmkindigi shekteýli adamdardyń qajettilikterin eskeredi, bul onyń áleýmettik mańyzdylyǵyn kórsetedi», - dep túsindirdi oqýshy.
Osy jobamen túrli baıqaýda birinshi oryn alǵan ol Şýche qalasy ákiminiń qabyldaýynda bolǵan. Qala basshylyǵy jobany iske asyrýǵa ýáde bergen.
Aıta ketsek, budan buryn Aqmola oblysynda múgedektigi bar adamdar úshin 900-den astam nysan beıimdelgenin jazǵan edik.
