Aqmolalyq mobıldi qosymsha ornatyp, 5 mln teńgesinen aıyrylyp qaldy

KÓKShETAÝ. KAZINFORM — Aqmola oblysy Sandyqtaý aýdanynyń polıtsııa bólimi alaıaqtyq faktisi boıynsha qylmystyq isti tergep jatyr, onyń qurbany 55 jastaǵy jergilikti turǵyn.

— Belgisiz adamnyń qońyraýnan keıin er adam uıaly telefonyna qosymsha ornatyp, kelesi kúni depozıtte saqtalǵan 5 000 000 teńgeden aıyrylyp qaldy. Bul rette ótinish berýshi qandaı da bir kodtardy, jeke derekterdi nemese banktik shottardy eshkimge aıtpaǵan, sondaı-aq aqsha aýdarmaǵan, — delingen polıtsııa habarlamasynda.

Aýyl turǵyny ózin ulttyq banktiń qyzmetkerleri bolyp tanystyrǵan belgisiz adamdardan qońyraý túskenin aıtqan. Olar er adamdy aqshany bir banktiń depozıtinen ekinshisine aýdarýǵa kóndirgen.

Keıinnen aqmolalyq depozıtin teksergende, ol 2,5 mln teńgeden eki tranzaktsııamen 5 000 000 teńge úshinshi tulǵanyń shottaryna aýdarylǵanyn bilgen.

Qazirgi ýaqytta polıtsııa jedel jáne tergeý is-sharalaryn júrgizip jatyr.

Aıta ketelik Almatyda ınternet-alaıaqtyqqa paıdalanylǵan arnaıy jabdyq tárkilendi.