Aqmolalyq abaısyzda óziniń 1 jastaǵy qyzyn basyp, mert qyldy

KÓKShETAÝ. KAZINFORM – Aqmola oblysynyń Tselınograd aýdanynda 30 jastaǵy er adam kóligimen abaısyzda óziniń 1 jarym jasar qyzyn basyp mert qyldy.

Aqmola oblysy PD baspasóz qyzmetiniń málimetinshe, jazataıym oqıǵa búgin 16 aqpanda saǵat 09:00 shamasynda Aqmol aýylynda boldy.

Bul týraly saǵat 10:46 Tselınograd aýdandyq PB kezekshi bólimine 1,5 jasar balany kólik basyp ketkendigi týraly habar tústi. Anyqtalǵandaı, «Toyota Estima» kóliginiń 30 jastaǵy júrgizýshi Aqmol aýylyndaǵy balabaqsha aýmaǵynda óziniń qyzyn basyp ketti. Ákesi qyzyna medıtsınalyq kómek kórsetý úshin dereý Astana qalasyna jetkizdi. Alaıda aýrýhanada bala qaıtys boldy.

«Qazir osy derek boıynsha Qylmystyq kodekstiń 345-baby 3-bóligi boıynsha «kólik quraldaryn basqaratyn adamdardyń jol qozǵalysy nemese kólik quraldaryn paıdalaný erejelerin buzýy» is qozǵalyp, sotqa deıingi tergeý amaldary júrgizilip jatyr», - dep túsindirdi Kazinform tilshisiniń saýalyna PD baspasóz qyzmetinen.

Aıta ketsek, budan buryn Aqmola oblysynda jol apatynan eki adam kóz jumǵanyn jazǵan edik.