Aqmolada TKSh tarıfterin tómendetý máselesi qatań baqylaýǵa alyndy

KÓKShETAÝ. QazAqparat - Aqmola oblysynda turǵyn úı kommýnaldyq sharýashylyǵy (TKSh) tarıfterin tómendetý máselesi qatań baqylaýda, dep habarlaıdy QazAqparat tilshisi.

Aqmola oblysynyń ákimi Málik Myrzalın jylý tarıfterin qalyptastyrý máselesi, sondaı-aq, oblys ortalyǵyn jylý energııasymen qamtamasyz etýshi «Kókshetaý jylý» kommýnaldyq kásiporyn jumysyna júrgizilgen prokýrorlyq tekseristiń qorytyndysy talqylanǵan májilis ótkizdi.

Aımaq basshysy kommýnaldyq kásiporynnyń jumysyna  tıisti baqylaý júrgizbegen birqatar memlekettik organdardyń jumysyn synǵa alyp, kommýnaldyq kásiporyn áreketiniń zańdylyǵyn qysqa merzim ishinde anyqtaýdy tapsyrdy.

Sonymen qatar, aımaq basshysy Málik Myrzalın ótken jyly kásiporynǵa bólingen sýbsıdııa kóleminiń artqanyn, al ol óz kezeginde jylý energııasy tarıfiniń turaqtanýyna kepil bolatynyn atap ótti.

Búgingi tańda oblysta TKSh qyzmetiniń tarıfterin túsirý boıynsha aýdan jáne qalalardaǵy kommýnaldyq kásiporyndarmen jumystardy uıymdastyrý boıynsha sarapshylar men quzyretti ókilderden turatyn jumys toby quryldy.  Buǵan qosa, Kókshetaý qalasynyń kommýnaldyq kásiporyndary bir jylǵa 130 teńgeden 82 teńgege deıin tómendegen ótemaqy tarıfterin engizdi. Bul  2018 jyldyń 1  jeltoqsanynan bastap kókshetaýlyqtar úshin jylý aqysy 36 paıyzǵa arzandaıtyndyǵyn bildiredi.

Keler jyly Kókshetaýda qala turǵyndaryna qajetti jylý, elektr energııasyn óndirip, ystyq sýmen qamatamasyz etýge qaýqarly JEO qurylysy bastalady.