Aqmolada sottalǵandardyń 65 paıyzdan astamy revaktsına jasady

KÓKShETAÝ. QazAqparat - Arnaıy kontıngent arasynda vırýstyq aýrýdyń órshýine jol bermeý maqsatynda Aqmola oblysy boıynsha Qylmystyq atqarý júıesi departamentiniń ETs-166/4 mekemesinde revaktsınatsııa qarqyndy júrip jatyr, dep habarlaıdy QazAqparat tilshisi.

Aqmola oblysy boıynsha qylmystyq atqarý júıesi departamenti baspasóz qyzmetiniń málimetinshe, búgingi tańda kolonııadaǵy sottalǵandardyń 65 paıyzdan astamy qaıta vaktsınatsııalandy.

Bul protsedýrany Atbasar aýdanaralyq kópsalaly aýrýhanasynyń medıtsınalyq personaly júrgizip jatyr.

«Buǵan deıin sottalǵandar arasynda vaktsınatsııadan ótý qajettigi týraly aqparattyq túsindirý jumystary júrgizildi. Onda jazasyn ótep jatqandarǵa ımmýnıtetti nyǵaıtý, egpe alý tıimdiligi aıtyldy. Osy kúni Aqmola oblysynda sottalǵandardyń 65 paıyzdan astamy revaktsınatsııalandy», - dep atap ótti vedomstvonyń baspasóz hatshysy Irına Gornova.

Mobıldi medıtsınalyq brıgada óz jumysyn sottalǵandardy termometrııadan tekserý jáne allergııalyq reaktsııalardyń bar-joǵyn anyqtaýdan bastady.

Sottalǵandar ekpe almastan buryn oǵan kelisim berýge nemese bas tartýǵa arnalǵan qujattardy toltyrady.

«Sottalǵandar arasynda qaıta vaktsınatsııalaýǵa nıet bildirýshiler óte kóp, qyzmetkerler jaqsy aqparattyq jumys júrgizdi. Protsedýradan keıin sottalǵandar 30 mınýt bizdiń dárigerdiń baqylaýynda bolady. Olarǵa vaktsınatsııadan keıingi shekteý talaptary, múmkin bolatyn reaktsııa túsindirilip, medıtsınalyq bólimge júginý týraly usynystar beriledi», - dep tolyqtyrdy Irına Gornova.