Aqmolada kúdiktini ustaý úshin alǵash ret áıelderdiń arnaıy jasaǵy tartyldy

KÓKShETAÝ. QazAqparat – Aqmola oblysynda esirtki daıyndaý jáne ótkizý boıynsha kúdiktiler ustaldy. Kúdikti áıeldi polıtsııaǵa jetkizý úshin alǵash ret áıelderdiń arnaıy jasaǵy tartyldy, dep habarlaıdy QazAqparat tilshisi.

Oblystyq polıtsııa departamenti baspasóz qyzmetiniń málimetinshe, Atbasar qalasyndaǵy esirtki qylmysyna qarsy is-qımyl basqarmasynyń qyzmetkerleri «Qarasora – 2022» jedel aldyn alý sharasy barysynda gashısh maıyn daıyndady jáne satýymen aınalysty degen kúdikpen azamattyq nekedegi erli-zaıyptylardy ustady.

«Anyqtalǵandaı, 38 jastaǵy er adam men onyń 37 jastaǵy áıeli úıde qarasoradan kannabıs syǵyndysyn jasap, odan alynǵan preparatty satqan. Sondaı-aq, er adam buryn esirtki zattarynyń zańsyz aınalymyna baılanysty qylmystary úshin sottalyp, esirtkini ózi qoldanyp kelgen», - dedi vedomstvodan.

Kúdiktilerdi ustaý kezinde olardan 4 gramnan astam gashısh maıy alyndy, osyǵan uqsas zat erli-zaıyptylardyń mekenjaıyn tintý kezinde tárkilendi.

Ustalǵan kezde áıel polıtseılerge qarsylyq kórsetip, tártip saqshylarynyń zańdy talaptaryna baǵynbady.

Kúdiktini ustaý jáne keıinnen polıtsııa bólimine jetkizý úshin alǵash ret áıelderden quralǵan jedel áreket etý arnaıy jasaǵynyń qyzmetkerleri tartyldy.

Polıtsııa qyzmetkerleriniń kásibı is-áreketiniń arqasynda kúdikti ustaldy.

«Qazirgi ýaqytta osyǵan baılanysty Qylmystyq kodekstiń 297 - babynyń 3-bóligi «esirtki quraldaryn zańsyz ótkizý» boıynsha sotqa deıingi tergeý amaldary júrgizilýde. Kúdiktiler ýaqytsha ustaý ızolıatoryna qamaldy», - dep tolyqtyrdy vedomstvodan.

Aıta ketsek, budan buryn Astana turǵyny Kókshetaýda esirtki zatyn jasyrý kezinde ustalǵan edi.