Aqmolada kenshiler 200 metr tereńde jasyryn tseh ashyp, altyn urlap kelgen

KÓKShETAÝ. KAZINFORM — ІІM Aqmola oblysynyń ken oryndarynda quramynda altyny bar materıaldardyń zańsyz aınalymyna qatysy bar zańsyz ken qazýshylardyń áreketin toqtatý boıynsha júıeli jumys júrgizip keledi, dep habarlaıdy Polisia.kz.

Bıyl polıtsııa qyzmetkerleri 400-den astam zańsyz ken qazýshylardy ustap, jaýapkershilikke tartty. Segiz qylmystyq is tirkeldi.

Sondaı-aq top bolyp áreket etetin ken qazýshylardyń brıgadalary anyqtalyp, joly kesildi.

Osyndaı uıymdasqan topty bıyl qańtar aıynda Aqmola oblysy PD uıymdasqan qylmysqa qarsy kúres basqarmasy ustap, kendi qaıta óńdeıtin zańsyz tseh joıyldy. 

Salmaǵy 600 kg-nan astam quramynda altyny bar 26 qap tárkilendi.

Sáýir aıynda Stepnogor qalasy prokýratýrasynyń úılestirýimen uıymdasqan qylmysqa qarsy kúres bólinisi altyn urlaýmen aınalysqan úsh zańsyz ken qazýshy brıgadanyń jolyn kesti. 

— Kendi qaıta óńdeıtin úsh shaǵyn tseh, segiz tonnadan astam quramynda altyny bar kontsentrat, kontrafaktilik zergerlik buıymdardyń ondaǵan jıyntyǵy tárkilendi. Shahtanyń 200 metr tereńinde jerasty jýý tsehy tabyldy. Polıtsııaǵa 20-dan astam adam jetkizildi. Tergeý jalǵasyp jatyr, — deıdi ІІM uıymdasqan qylmysqa qarsy kúres departamentiniń ókili Qýandyq Alpys.

26 mamyrda Aqsý jáne Bestóbe eldi mekenderinde jedel-izdestirý is-sharalaryn júrgizý kezinde taǵy úsh jerasty ken óńdeý tsehy tabyldy.

— Ártúrli jabdyqtar, shamamen 300 qap ken tárkilendi. Qylmystyq shemanyń uıymdastyrýshylary men qyzmetkerleri ustaldy. Bul baǵyttaǵy jumys jalǵasýda jáne erekshe baqylaýda, — dedi Qýandyq Alpys.