Aqmolada alǵash ret varıkozdy tamyrlarǵa lazerlik ota jasaldy
Naýqasqa ota jasaýǵa MBA doktory, tamyrly hırýrg, ınterventsııalyq rentgenhırýrg, Nur-Sultan qalasyndaǵy «Ulttyq ǵylymı onkologııalyq ortalyq» JShS ınterventsııalyq rentgenhırýrgııasynyń basshysy Azat Shynalıev keldi.
Aıta keteıik, mundaı ota Aqmola oblysynda alǵash ret jasalyp otyr.
«Búgingi tańda varıkozdy emdeýdiń «altyn standarty» bar, bul - tamyrlardyń lazerlik ablıatsııasy. Meniń saparymnyń negizgi maqsaty – jergilikti dárigerlermen tájirıbe almasý. Jergilikti turǵyndarǵa kómek kórsetý úshin olarǵa osy ádistemeni kórsetkim keledi. Tehnıkanyń artyqshylyǵy - jergilikti anestezııamen bir kishkentaı pýnktsııa arqyly júzege asyrylady. Otadan keıin naýqas uzaq ońaltýdy qajet etpeıdi», - dep bólisti Azat Shynalıev.
Dárigerdiń aıtýynsha, buryn mundaı ota tek úlken qalalarda - Nur-Sultan, Almaty, Shymkentte ǵana jasalǵan.
«Biz alǵash ret osyndaı operatsııany jasap jatyrmyz jáne bolashaqta osy tehnologııany damytamyz. Bastapqyda master-klass ákelingen jabdyqta ótkiziledi, biraq oblystyq kópbeıindi aýrýhana mundaı qurylǵyny aldaǵy ýaqytta satyp alýdy josparlap otyr. Bul - shamamen 20-25 mıllıon teńge turatyn lazerlik apparat», - dep bólisti Aqmola oblystyq kópbeıindi aýrýhanasy dırektorynyń orynbasary Dmıtrıı Chaıkov.
Aqmola oblysy densaýlyq saqtaý basqarmasynyń basshysy Narıman Syzdyqov osyndaı sheberlik sabaqtaryn ótkizýge qoldaý bildirdi.
Oblystyń bas dárigeri óńirde emdeýdiń ınnovatsııalyq jáne tıimdi ádisterin engizýdi óz jumysynyń negizgi basymdyǵy dep sanaıdy.
«Jumsaq hırýrgııalyq aralasýdyń bul túri kesýsiz jasaýǵa múmkindik beredi. Naýqastyń jalpy qalpyna kelýi de tez júredi. Emdeýdiń bul túriniń artyqshylyǵy - jaraqattanýdyń azdyǵy jáne patsıentterdiń statsıonarda bolýynyń qysqa merzimi, otadan keıin tez qalpyna kelý, aýyrsyný sezimi joq, otadan keıin tyrtyq qalmaıdy», - dedi N. Syzdyqov.
Dárigerler atap ótkendeı, naýqastarǵa arnalǵan mundaı otalar tegin medıtsınalyq kómektiń kepildik berilgen kólemi sheńberinde júrgiziledi.
