Aqmolada 5,6 mln gektar egistik alqaby tsıfrlandyryldy

KÓKShETAÝ. QazAqparat - Aqmola oblysynda 5,6 mıllonnan astam gektar egistik alqapta tsıfrlandyrý júrgizildi. Bul týraly óńirlik kommýnıkatsııalar qyzmetinde ótken brıfıngte Aqmola oblysynyń aýyl sharýashylyǵy basqarmasy basshysynyń orynbasary Dımash Talaspaev málim etti, dep habarlaıdy QazAqparat tilshisi.

Brıfıngte bıylǵy jylǵy kúzgi egin jınaý naýqanynyń qorytyndylary jáne Elbasynyń «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty Joldaýynda týyndaıtyn aldaǵy mindetter aıtyldy.

Basqarma basshysy orynbasarynyń aıtýynsha, bıylǵy jyly aýa raıy onsha qolaıly bolmasa da dıqandar qaýymy úshin tabysty boldy.

«Oblys boıynsha 4,3 mıllıon gektar egistik alqapqa dándi jáne burshaq daqyldary sebilip, 5,6 mıllıon tonna astyq jınaldy. Gektardan 13 tsentner ónim alynǵan. Keler jylǵa qajette tuqym qory jasaldy. Jalpy, bıylǵy jınalǵan astyqtyń sapasy birshama táýir. Bul kórsetkish óńirdiń agroóndiristik kesheni men aýyl sharýashylyǵy salasyn turaqty damytýǵa jáne jergilikti eldi mekenderdiń áleýmettik-ekonomıkalyq jaǵdaıyn jaqsartýǵa múmkindik beredi», - dedi Dımash Talaspaev.

Sonymen qatar, ol óńirdegi agroónerkásiptik keshenderin damytýda aýyl sharýashylyǵy kásiporyndarynda tsıfrlyq tehnologııalar engizilip jatqanyn atap ótti.

«Tsıfrlandyrý sharasy sheńberinde oblystaǵy 35 sharýashylyqta naqty eginshilik elementteri engizildi. Oblysta naqty eginshilik tehnologııalaryn engizý boıynsha bazalyq 3 kásiporyn (Tselınograd aýdanyndaǵy «Aqmola Fenıks» AQ, Zerendi aýdanyndaǵy «Dıhan Plıýs» JShS jáne Bulandy aýdanyndaǵy «Jýravlevka-1» JShS) anyqtaldy. Budan bólek, «A.I.Baraev atyndaǵy AShǴÓO» JShS aýmaǵynda bıylǵy jyly 3 myń gektar alqapta naqty eginshilik elementteri synaqtan ótip jatyr», - dedi Dımash Talaspaev.

Brıfıngte basqarma basshysynyń orynbasary Qoldau.kz portalynda egistik jerlerdiń elektrondy kartasyn jasaý máselesine de toqtaldy. Onyń sózine qaraǵanda oblys boıynsha 2 921 jer paıdalanýshy 5,6 mıllonnan astam gektar alqapta tsıfrlandyrý júrgizipti. Buǵan qosa, jaılymdyq jáne shabyndyq jerlerdi de tsıfrlandyrý sharasy júzege asyrylýda. Ásirese, Tselınograd aýdanyndaǵy «Astana ónim» aktsıonerlik qoǵamy jáne «Rodına» agrofırmasy» jaýapkershiligi shekteýli seriktestigi, Býrabaı aýdanyndaǵy «Esil Agro» jaýapkershiligi shekteýli seriktestigi tárizdi iri 3 sútti-taýarly fermasy tolyq tsıfrlandyryldy.