Aqmola oblysynda jolda qalǵan 60-tan astam adam qutqaryldy

ASTANA. QazAqparat - Aqmola oblysynyń avtojoldarynda kúrdeli jaǵdaı saqtalýda. Qarly boran saldarynan oblys boıynsha 13 respýblıkalyq mańyzy bar jáne 23 oblystyq mańyzy bar joldar jabyldy, - dep habarlaıdy Aqmola oblysy TJD baspasóz qyzmeti.

Aýa raıynyń nasharlaýyna baılanysty 2023 jylǵy 3 qańtarda oblys joldarynda kúrdeli jaǵdaı qalyptasqan. Respýblıkalyq mańyzy bar beketter men avtojoldar blogynan TJ departamenti polıtsııa qyzmetimen jáne jergilikti atqarýshy organdarmen birlesip Atbasar, Jaqsy jáne Tselınograd aýdandarynyń jylytý pýnktterine 65 adamdy evakýatsııalady, onyń ishinde 5 bala. Sondaı-aq, TJD kúshimen tehnıkalyq aqaýly jeńil avtokólikten Ereımentaý qalasyndaǵy turǵylyqty jeri boıynsha tórt adam qutqarylyp, jetkizildi, olar medıtsınalyq kómekke muqtaj bolǵan joq. Qutqarylǵandardyń ishinde jaraqat alǵandar men zardap shekkender joq.

«Oblys aýmaǵynda aǵymdaǵy jylǵy 3 qańtarda, 4 qańtarda Aqmola oblysynyń basym bóliginde boran bolady dep kútilýde. Ońtústik-batystan soqqan jel túnde oblystyń basym bóliginde 15-20 m/s, oblystyń ońtústiginde, soltústiginde, shyǵysynda ekpini 23-28 m/s, kúndiz oblystyń soltústiginde, ońtústiginde, shyǵysynda 15-20, ekpini 23 m/s bolady», – dep brıfıng barysynda Aqmola oblysy TJD bastyǵynyń orynbasary Qaırat Qasym atap ótti.

Aqmola oblysynyń TJD azamattarǵa aýa raıynyń qubylmalylyǵyna nazar aýdaryp, baqylaý qajettigin eske salady. Daýyl týraly eskertý habarlamalaryn eskerip, qajetti saqtyq sharalaryn saqtańyzdar.