Aqmola oblysynda volonterler marapattaldy

KÓKShETAÝ. QazAqparat - Aqmola oblysynyń ákimi, «Nur Otan» partııasy oblystyq fılıalynyń tóraǵasy Ermek Marjyqpaev koronavırýs ınfektsııasymen kúresýde «Biz Birgemiz» respýblıkalyq aktsııasy sheńberinde muqtaj jandarǵa kómek kórsetken belsendi volonterlerdi QR Tuńǵysh Prezıdenti Nursultan Nazarbaevtyń Alǵys hattarymen marapattady, dep habarlaıdy QazAqparat tilshisi oblys ákimdiginiń baspasóz qyzmetine silteme jasap.

Salanatty shara barysynda aımaq basshysy E.Marjyqpaev «Jas Otan» jastar qanatynyń volonterleri oblys boıynsha barlyǵy 11,5 myńnan astam otbasyǵa azyq-túlik, maska jáne áleýmettik mańyzy bar taýarlardy jetkizgenin atap ótti.

Partııa kóshbasshysy qazaqstandyq volonterlerge alǵys retinde Alǵys hattarǵa óz qoltańbasyn qoıǵan.

«Volonterler qozǵalysynda belsendilik tanytqan aqmolalyq 27 jas Elbasynyń Alǵys hatymen marapattaldy. Qaıyrymdy ispen aınalysatyn aqmolalyqtardyń geografııasy úlken, oblystyń barlyq aýmaǵyn qamtıdy» , - deıdi ákimdiktiń baspasóz qyzmetindegiler.

Aıta keteıik, Aqmola oblys boıynsha barlyǵy 11,5 myńnan astam otbasyǵa 170 mıllıon teńge kóleminde kómek kórsetildi. Pandemııa kezinde áleýmettik jaǵynan az qamtylǵan jáne ómirde qıyn jaǵdaıǵa tap bolǵan 17225 azamat jalpy somasy 861 250 000 teńgeniń kómegin aldy. Sonymen birge tórtinshi kezeń boıynsha 197 500 000 teńgege 3950 adamǵa kómek kórsetý úshin qujattary ázirlendi.