Aqmola oblysynda úzdik muǵalimder marapattaldy
Kókshetaýdaǵy «Bolashaq saraıy» balalar men jasóspirimder saraıynda uıymdastyrylǵan sharaǵa aımaq Ermek Marjyqpaev qatysyp, quttyqtaý sóz sóıledi.
«El Prezıdenti Qasym-Jomart Toqaev óziniń bıylǵy Joldaýynda Qazaqstandyq bilim men ǵylymnyń aldynda aýqymdy da kezek kúttirmeıtin mindet turǵanyn atap ótti. Búgingi tańda ýaqyt bilim berý júıesine jańa talaptar qoıyp otyr, ony oryndaýda muǵalimniń róli zor. Pedagog kadrlardy tartý úshin oblys bıýdjetinen jyl saıyn granttar bólinedi. Búginde bul grant boıynsha 400-ge jýyq jas bilim alyp júr. Bıyl 100 mamanǵa oblys mektepterine joldama berildi. Aýyldyq jerlerde jumys isteý úshin muǵalimderdi tartý, yntalandyrý retinde «Dıplommen - aýylǵa» baǵdarlamasynyń bereri mol. Osy rette bıyl 160 mamanǵa turǵyn úı satyp alýǵa 690 mıllıon teńge nesıe berildi, 322 maman 94 mıllıon teńge kóleminde kótermeaqy aldy», - dedi Ermek Marjyqpaev.
Aımaq basshysy atap ótkendeı, bilim berýdi damytýdyń 2020-2025 jyldarǵa arnalǵan memlekettik baǵdarlamasyn iske asyrý sheńberinde Aqmola oblysynda bilim berý júıesin jańǵyrtý jáne damytý boıynsha jumys júrgizilip jatyr.
Oblystyń bilim salasyn qarjylandyrý jyl saıyn artyp, búginde 132 mıllıard teńgege jetti.
Búginde oblysta 1300-ge jýyq bilim uıymy jumys isteıdi, onda 21 myńnan astam pedagog eńbek etedi.
123 muǵalim «Bilim berý isiniń qurmetti qyzmetkeri» ataǵyna ıe, 101 muǵalim «Ybyraı Altynsarın» medalimen, 15 muǵalim «Eńbek ardageri» medalimen marapattaldy.
Oblystyń 30-dan astam muǵalimi «Úzdik pedagog» respýblıkalyq baıqaýynyń grantynyń ıegeri.
Bilim berý júıesin damytýǵa qosqan eleýli úlesi úshin aımaq basshysy muǵalimderge vedomstvolyq nagradalar men alǵys hattardy tapsyrdy.
Naqtyraq aıtsaq, shara barysynda 11 jas pedagogke oblys ákiminiń 100 myń teńge kóleminde syılyǵy tapsyryldy.
2 pedagog adal eńbegi úshin 500 aılyq eseptik kórsetkish sertıfıkatyna, J.Mýsın atyndaǵy Kókshetaý joǵary Qazaq pedagogıkalyq kolledji, «Juldyz» sanatorııalyq úlgidegi oblystyq orta mektep-ınternaty, tıisinshe 3 jáne 2 mıllıon teńge kóleminde oblys ákimniń sertıfıkatyna ıe boldy.
«Úzdik pedagog – 2021» respýblıkalyq baıqaýynyń qorytyndysy boıynsha Aqmola oblysynyń 2 úzdik muǵalimi «Úzdik pedagog» tósbelgisin alyp, 2,9 mıllıon teńge kóleminde syıaqy aldy.
Olardyń arasynda Kókshetaý qalasyndaǵy «Órken» bóbekjaıynyń mýzykalyq jetekshisi Olga Korıabkına, Jaqsy aýdany Jaqsy aýylyndaǵy №1 jalpy bilim beretin mekteptiń qazaq tili men ádebıeti pániniń muǵalimi Lázzat Qasqaeva bar.
Saltanatty is-shara Aqan seri atyndaǵy joǵary kolledj, Birjan sal atyndaǵy mýzykalyq kolledj jáne J.Mýsın atyndaǵy Qazaq joǵary pedagogıkalyq kolledji stýdentteriniń oryndaýyndaǵy kontsertke ulasty.
