Aqmola oblysynda saıası partııalardan kandıdattardyń saılaýǵa qatysý máselesi talqylandy

KÓKShETAÝ. QazAqparat - Aqmola oblystyq saılaý komıssııasy kentter, aýyldyq okrýgter men aýyldardyń ákimderin saılaýǵa qatysatyn saıası partııalarmen kezdesý ótkizdi, dep habarlaıdy QazAqparat tilshisi.

Talqylaýdyń negizgi máselesi saılaýǵa qatysý úshin saıası partııalardan jáne ózin-ózi usynýshylardan kandıdattardyń qujattaryn daıyndaýdy uıymdastyrý rásiminiń tetigin túsindirý boldy. Oblystyq saılaý komıssııasynyń tóraǵasy Manarbek Sadýov saılaý týraly zańnamanyń jańa engizilimderin egjeı-tegjeıli baıandady.

«Saılanatyn ákimderge qoıylatyn talaptar joǵary: Konstıtýtsııalyq zań boıynsha ol buryn sybaılas jemqorlyq áreketimen kózge túspegen, joǵary bilimdi jáne QR azamaty bolýy tıis, sondaı-aq, jasy 25 jastan kishi bolmaýy tárizdi kóptegen talaptar bar. Taǵy bir jańalyq - buryn depýtattardy, tipti prezıdentterdi saılaǵan kezde «men bárine qarsymyn» degen baǵan bolmaǵan edi, ıaǵnı saılaýǵa kelgender «men qarsymyn» degen baǵandy taǵaıyndaı alady, eger kandıdattardy kóńili qalamasa, sodan keıin azamattar ózin-ózi usyna alady. Biraq sol azamat partııa múshesi bolýy kerek, bul turǵyda halyqtyń 1 paıyz daýysy esepteledi. Eger 800 adam jáne 8 adam qoldasa, onda bul kandıdattyń atqarýshy bılik organdaryna saılanýǵa múmkindigi bar», - dedi Manarbek Sadýov.

Budan ári qatysýshylar aýyl, kent, aýyldyq okrýg jáne aýdandyq mańyzy bar qala ákimderiniń tikeleı saılaýyn ótkizýdiń quqyqtyq jáne uıymdastyrýshylyq negizderine egjeı-tegjeıli toqtaldy.

Aıta keteıik, óńirde jumys istep turǵan 239 ákimniń 95-i (40 paıyzy) saılanatyn bolady. Olardyń saılaýyna 100 000 aqmolalyq qatysady – saılaýshylardyń jalpy sanynyń 19 paıyzy. Arshaly, Jarqaıyń, Ereımentaý, Tselınograd aýdandarynyń turǵyndary aýdan ortalyqtary ákimshilikteriniń basshylaryn saılaıdy.