Aqmola oblysynda múlikti jymqyrý men alaıaqtyǵy úshin sheneýnik sottaldy
Aqmola oblystyq soty baspasóz qyzmetiniń málimetinshe, Arshaly aýdany TKSh bóliminiń burynǵy basshysy J. men N. esimdi sybaılastaryna memleket menshigindegi gaz taratý stantsııasynyń ǵımaratyn bólip alýdy usynǵan. Oǵan ruqsat alý úshin olardan 12 mıllıon teńge suraıdy.
«Aıyptalýshy aldyn ala tólem retinde 4 mln teńge alyp, bólý quqyǵyn berý týraly jalǵan anyqtama jazǵan. Biraq keıinirek olarǵa obektini bólýdiń ornyna jalǵa alýdy usynǵan jáne olarmen 30 jylǵa múliktik basqarý shartyna qol qoıyp, bul úshin kóbirek aqsha talap etken. Osylaısha, Qylmystyq kodekstiń 190-babynyń 3-bóliginiń 1, 2-tarmaqtary boıynsha – qyzmettik erejeni paıdalana otyryp, iri kólemde alaıaqtyq jasady», - dep habarlady sottan.
Odan bólek, aıyptalýshy tanysynan 11 mln teńge qaryz alǵan. Kepil retinde TKSh bóliminiń balansynda turǵan generator qondyrǵysyn qoıǵan. Bul – QR QK 189-baby 3-bóliginiń 2-tarmaǵynda jazylǵan «senip tapsyrylǵan múlikti jymqyrý». Memleketke 1 mln 322 myń teńge materıaldyq shyǵyn kelgen.
«Jábirlenýshiler men kýágerlerdiń aıǵaqtary, tekserý hattamalary jáne aıǵaqtardy naqtylaý arqyly, qujattardy alý jáne qaraý hattamasy, qabyldaý-tapsyrý aktisi, tekserý hattamasy, sarapshylardyń qorytyndylary, aýdıtorlyq esep arqyly aıyptalýshynyń kinási dáleldendi. Jaza taǵaıyndaý kezinde sot onyń jas balalarynyń bolýyn eskerdi jáne memlekettik qyzmetshi antyn buzyp, qylmystyq quqyqbuzýshylyq jasaǵanyn da nazardan tys qaldyrmady», - dep túsindirdi vedomstvodan.
Arshaly aýdandyq sotynyń úkimimen eks-sheneýnikke bes jyl bas bostandyǵynan aıyrý jazasy taǵaıyndaldy. Ol sondaı-aq, memlekettik qyzmette jumys isteý quqyǵynan aıyryldy.
Úkim áli zańdy kúshine engen joq.
