Aqmola oblysynda menıngıtke 544 adam tekserildi
Brıfıngte Serik Omarhanov menıngokokk ınfektsııasy boıynsha sońǵy tirkelgen málimetke baılanysty túsinikteme berdi.
Onyń aıtýynsha, Býrabaı aýdanynyń Şýchınsk qalasyndaǵy mamandandyrylǵan medıtsınalyq mekemesine 2018 jyldyń 1 maýsymy kúni menıngokokk ınfektsııasyn juqtyrdy degen kúdikpen naýqas túsken. Naýqastyń jutqynshaǵynan jaǵyndy alynyp, «Nisseria meningitides» tabyldy (saý juqtyrýshy). 1 maýsymda ınfektsıonıst-dáriger profılaktıkalyq em taǵaıyndady. Búgingi kúni naýqas ızolıatorǵa oqshaýlanǵan, sanatsııa jáne antıbıotıktermen emdeý júrgizilýde.
Aqmola oblysynyń medıtsınalyq uıymdarynyń málimetteri boıynsha, 544 adam tekserildi, onyń 251-i patsıent jáne 293-i personal. 298 analızde ınfektsııa tabylmaǵan, 246-sy jumys barysynda. Zertteý kezinde barlyq 544 adamda klınıkalyq belgiler anyqtalmaǵan.
«Aldyn alý maqsatynda Şýchınsk qalasyndaǵy turǵyn úı mekenjaıy boıynsha 5 adam tekserildi, nátıjeleri - teris. Al Aqkól aýdanynda menıngıt ınfektsııasyna kúdikti turǵyndar joq. Sonymen qatar, 5 maýsym kúni Astana qalalyq juqpaly aýrýlar aýrýhanasynda jatqan 1994 jyly týǵan Shortandy aýdanynyń turǵynynda menıngokokk ınfektsııasyna kúdik joıylyp, «Enterovırýsty ınfektsııa» dıagnozy qoıyldy. Naýqas emdelip jatyr. Qarym-qatynasta bolǵan 7 adammen profılaktıkalyq jumys júrgizildi. Zerthanalyq zertteý, otorınolarıngolog dárigerdiń tekserýi, menıngokokk ınfektsııasynyń aldyn alý sharalary týraly áńgime ótkizildi», - dep túsindirdi Serik Omarhanov.
Eske sala keteıik, Aqmola oblysy boıynsha táýlik boıy 8 (800) 080-64-81 nomerimen call-ortalyq jumys isteıdi. Maýsymnyń 6-7 kúnderindegi jaǵdaı boıynsha menıngıtti aldyn alý, dıagnostıkalaý jáne emdeý máseleleri jóninde 55 suraq kelip tústi. Barlyq suraqtar boıynsha tıisti túsiniktemeler berildi.
