Aqmola oblysynda memlekettik tildi úıretetin 288 top ashyldy

NUR-SULTAN. QazAqparat – Aqmola oblysynda 20 til úıretý ortalyǵy jumys istep jatyr. Ol jerlerde tyńdarmandar memlekettik jáne aǵylshyn tilin úırenip jatyr. Atalǵan oblysta memlekettik tildi úıretý jumysy týraly oqý-ádistemelik ortalyǵynyń basshysy Qarataı Tólekeev aıtyp berdi, dep habarlaıdy QazAqparat tilshisi.

«Qazir Aqmola oblysy boıynsha 20 tilderdi oqytý ortalyǵy jumys isteıdi. Bıylǵy oqý jylynda memlekettik tildi úıretý úshin 288 top ashylyp, oǵan 3124 tyńdaýshy qabyldandy. Al aǵylshyn tili boıynsha 56 top ashylyp, 597 tyńdaýshy qabyldandy. Bul baǵyttaǵy jumystar elimizde tilderdi damytý men qoldanýdyń 2020-2025 jyldarǵa arnalǵan memlekettik baǵdarlamasy sheńberinde júzege asyp jatyr. Sonymen qatar bes deńgeılik ulttyq standart pen birúlgi baǵdarlama boıynsha memlekettik tildi oqytýdyń 3 deńgeılik oqý baǵdarlamalaryna sáıkes «Qaztest» júıesiniń oqý-ádistemelik keshenin qoldanamyz», - dedi Qarataı Tólekeev.

Onyń aıtýynsha, endigi ýaqytta tyńdarmandar tildi kásibı turǵyda úıretýdi surap otyr.

«Bul talap oryndy dep oılaımyn. Sondyqtan bolashaqta mektep baǵdarlamasynda tilge basa nazar aýdaryp, saǵat sanyn kóbeıtip, UBT tapsyrǵanda qazaq tildi bilý deńgeıi naqty anyqtalýy kerek. Joǵary oqý ornynda mektepten alǵan til bilý deńgeıin ary qaraı júıeli túrde jalǵastyryp, qazaq tilin tereń meńgerý boıynsha synaq ótkizilse», - deıdi ol.

Sondaı-aq, ortalyq basshysy memlekettik qyzmetke ornalasý úshin tapsyratyn emtıhan kezinde úmitkerdiń qazaq tilin meńgerý deńgeıi esepke alynsa degen usynys jasady.

«Tilderdi oqytý ortalyqtary 360 saǵat tyńdaýshynyń alǵan bilimin qaıtalatpaı, 60 nemese 120 saǵattyq kásibı sala boıynsha oqytsa deımiz. Sol kásiptiń leksıkalyq mınımýmyn tolyqtyryp, jumys salasy boıynsha qujat aınalymyn úıretip, tilin ábden jattyqtyrsaq, qarajatqa da ýaqytqa da únem bolar edi. Ol úshin eshqandaı reformanyń keregi joq», - dedi Q. Tólekeev.