Aqmola oblysynda kúzgi egin oraǵyna 7 myńǵa jýyq kombaın paıdalanylady
Oblys ákimdigi baspasóz qyzmetiniń málimetinshe, agrokeńeste Aqmola oblysynyń agroónerkásiptik keshenin damytý jónindegi negizgi mindetter men egin jınaý naýqanyn ótkizýge daıyndyq barysy qaraldy. Oǵan óńirdiń 120-dan astam aýyl sharýashylyǵy taýaryn óndirýshiler, sondaı-aq memlekettik organdardyń ókilderi men ǵylymı-zertteý mekemeleriniń qyzmetkerleri qatysty.
Іs-shara «Ýrojaı», «Aıbat» jaýapkershiligi shekteýli seriktestikteriniń aýyl sharýashylyǵy ónimderin óndirý jáne qaıta óńdeý nysandarynyń óndiristik qyzmetimen, sondaı-aq «AgroComplexExpert» jaýapkershiligi shekteýli seriktestiginiń agrohımııalyq zerthanasymen tanysýdan bastaldy. Sonymen qatar qatysýshylar áleýmettik nysandarǵa, sonyń ishinde «Jaqsy» saýda úıine, sporttyq-jattyǵý keshenine jáne basqa da nysandarǵa bardy. Jıyndaǵy alǵy sózinde Ermek Marjyqpaev agrokeńestiń «TNK» - «Belaǵash» agrofırmasynda ótýi kezdeısoq emes ekenin atap ótti.
«Kompanııa toby zamanaýı tehnologııalardy tek ósimdik sharýashylyǵy ónimderin óndirýde ǵana emes, sonymen qatar mal sharýashylyǵy ónimderin óndirýde jáne aýyl sharýashylyǵy ónimderin tereń óńdeýde de belgili bir nátıjelerge qol jetkizdi», – dep atap ótti óńir basshysy.
Keńeste egin jınaý jumystaryn barynsha uıymshyldyqpen sapaly júrgizý, sondaı-aq aýyl sharýashylyǵy men jer qatynastary salasyndaǵy ózekti máseleler boıynsha daıyndyq pen mindetter qaraldy. Osy taqyrypta oblystyń aýyl sharýashylyǵy jáne jer qatynastary basqarmasynyń basshysy Kenesh Álimjanov baıandama jasady.
«Kóktemgi egis jumystary boıynsha keshendi sharalar jáne eginge ýaqytyly kútim jasaý óńirde astyq daqyldarynyń 45,4 paıyz jaqsy, 50,4 paıyz qanaǵattanarlyq jaǵdaıda bolýyna múmkindik berdi. Oblystyń barlyq aýdany tamyzdyń ekinshi onkúndiginde jappaı astyq jınaýdy bastaıdy», – dedi Kenesh Álimjanov.
Egin jınaýǵa 8,9 myńnan astam kombaın, onyń ishinde 4,7 myńnan astam birlik qazirgi zamanǵy ónimdiligi joǵary kombaın jumyldyrylady. Búginde tehnıka júz paıyzǵa daıyn. Egin jınaýǵa memleket dızel otynynyń arzandatylǵan kólemin (90,5 myń tonna) bóldi. Astyqty qabyldaýǵa jalpy syıymdylyǵy 4,7 mıllıon tonnalyq 71 astyq qabyldaý pýnkti qatysady.
Agrokeńes barysynda A.Baraev atyndaǵy astyq sharýashylyǵy Ǵylymı óndiristik ortalyǵynyń dırektory Tımýr Savın baıandama jasady. Ol egin jınaýdyń strategııasy, taktıkasy jáne uıymdastyrylýy týraly aıtyp berdi. Aýyl sharýashylyǵyn damytý perspektıvalary týraly «Agrofırma TNK» JShS bas dırektory Batyrbek Ýálıev, QR AShM AÓK oblystyq aýmaqtyq ınspektsııasynyń basshysy Qanat Aıtqojın shegirtke zııankesterine qarsy ótkizilgen fıtosanıtarııalyq is-sharalarmen, Sh.Ýálıhanov ýnıversıtetiniń aýyl sharýashylyǵy jáne bıoresýrstar kafedrasynyń professory, bıologııa ǵylymdarynyń doktory, agronom ǵalym Ábiljan Qusaıynov Aqmola oblysynyń jaıylymdyq jerlerin basqarý men utymdy paıdalanýdyń ózekti máseleleri týraly bólisti.
Jıyndy qorytyndylaı kele, oblys ákimi egin jınaýdy ýaqytyly jáne sapaly júrgizý boıynsha barlyq qajetti sharalardy qabyldaýdy, mashına-traktor parkin jańartý boıynsha jumysty jalǵastyrýdy, astyq pen taýarlyq kredıtterdi forvardtyq satyp alý baǵdarlamalary sheńberinde kredıttik qarajatty tolyq qaıtarýdy tapsyrdy.
Aıta ketsek, budan buryn Atbasarda birqatar ınvestjoba iske asyrylyp jatqanyn jazǵan edik.
