Aqmola oblysynda kómir baǵasy qandaı
Aqmola oblystyq Energetıka jáne turǵyn úı-kommýnaldyq sharýashylyq basqarmasynyń málimetinshe, oblysty kómirmen qamtamasyz etý jumystary josparǵa sáıkes júrgizilip jatyr.
Aqmola oblysynyń turǵyndaryna 56 pýnktte kómir satylady. Jetkizý kólemin ulǵaıtý maqsatynda óńirlik operatorlar tizbesine 16 óńirden 64 jetkizip berýshi engizilgen.
Kómirdiń ortasha baǵasy tonnasyna 15 850 teńgeni quraıdy. Quny ótken jylmen salystyrǵanda 20-25 paıyzǵa qymbattaǵan. Muny kómir óndiretin oryndarda qatty otyn baǵasynyń artýymen jáne temirjol tarıfteriniń ósýimen baılanystyryp otyr.
«Basqarma turǵyndardyń jáne kommýnaldyq-turmystyq sektordyń kómirdi aldyn ala satyp alýy boıynsha medıa-jospar ázirlep, bekitti. Tıisti aqparattyq-túsindirý jumystary júrgizildi. Sonymen birge jylýmen jabdyqtaý obektilerin tehnıkalyq tekserý jumystary aıaqtalýǵa jaqyn. Osy jumystyń nátıjeleri boıynsha jóndeýdi qajet etetin ýchaskeler aıqyndalatyn bolady, olar aldaǵy birneshe jylǵa arnalǵan perspektıvamen kezeń-kezeńimen bólinetin bolady», - dedi basqarmanyń basshysy.
Danııar Qýanyshbaev atap ótkendeı, aldaǵy jylytý maýsymyna daıyndyq josparlanǵan is-sharalarǵa sáıkes jáne belgilengen merzimde aıaqtalady. Sondaı-aq vedomstvo aqmolalyqtardy kómirmen qamtý máselesin únemi baqylaýda ustamaq.
QazAqparat tilshisi oblys ortalyǵyndaǵy kómir satýmen aınalysatyn kompanııalarǵa habarlasyp, baǵany surap bildi. Otyndy jetkizip berýshilerdiń málimetinshe, qazir kómir quny tonnasyna 12,5 myń teńgeden 20 myń teńgege deıin qubylyp tur. Baǵa markasy men jetkizý qashyqtyǵyna baılanysty ózgeredi.
Atap aıtqanda, Ekibastuz kómiriniń tonnasyn 12,5-14 myń teńgege, Shubarkól kómirin – 16,7 - 20 myń teńgege, Qarajar kómirin – 16,5 - 20 myń teńgege, Maıkúbi kómirin 15 - 18 myń teńgege satyp alýǵa bolady.
