Aqmola oblysynda eginniń 21 paıyzy jınaldy
Aqmola oblysy Aýyl sharýashylyǵy jáne jer qatynastary basqarmasynyń málimetinshe, bıyl oblystaǵy egistik kólemi – 5,3 mıllıon gektar. Onyń 4,9 mıllıon gektarynda dándi jáne dándi-burshaqty daqyldar, 197 myń gektarda maıly daqyldar jáne 223,4 myń gektarda jemshóp bar. Búginde oblys boıynsha 1029,7 myń gektar alqaptaǵy egin orylyp, onyń 585,4 myń gektary bastyryldy.
Bul – barlyq egis alqabynyń 21 paıyzy. Oblys boıynsha ár gektardan orta eseppen 5,7 tsentnerden astyq jınalyp jatyr. Naýqanǵa 8,9 myńnan astam kombaın, onyń ishinde 4,7 myńnan astam birlik qazirgi zamanǵy ónimdiligi joǵary kombaın, 2,6 shalǵy, 4,8 júk kóligi tartylǵan. Egin jınaýǵa memleket tarapynan arzandatylǵan 90,5 myń tonna janar-jaǵarmaı bólindi. Sonymen birge, bıyl kóktemgi egis jáne egin jınaý jumystaryn qarjylandyrý úshin «Ken Dala» baǵdarlamasy boıynsha jeńildetilgen nesıe berý sheńberinde 39,5 mıllıard teńgege 444 aýyl sharýashylyǵy qurylymdary qarjylandyryldy.
«Aýyl sharýashylyǵy ónimderin forvardtyq satyp alý baǵdarlamasy boıynsha 4,1 mıllıard teńge bólindi, 54 sýbekt qarjylandyryldy, 59,2 myń tonna astyqqa kelisimshart jasalyp, taýarly nesıe túrinde 17 aýyl sharýashylyǵy taýaryn óndirýshige 66 myń tonna astyq jiberildi», - deıdi oblystyq Aýyl sharýashylyǵy jáne jer qatynastary basqarmasy basshysynyń orynbasary Qasym Itqusov.
Basqarma basshysynyń orynbasary atap ótkendeı, óńirde jańa túsken astyqty 72 astyq qabyldaý pýnkti qabyldaıdy. Olardyń jalpy syıymdylyǵy – 4,8 mıllıon tonna. Budan bólek, aýyl sharýashylyǵy qurylymdarynyń menshiginde jalpy syıymdylyǵy 2,4 mıllıon tonnadan asatyn jeke astyq qoımalary bar.
Aıta ketsek, budan buryn Aqmola oblysynda egin jınaý naýqany máseleleri jónindegi komıssııa qurylǵanyn jazǵan edik.
