Aqmola oblysynda ata-analardyń shaǵymynan keıin mektep dırektory qyzmetinen bosatyldy
QazAqparat halyqaralyq aqparat agenttiginiń redaktsııasyna Aqkól aýdandyq bilim bólimine qarasty Aqkól orman sharýashylyǵy aýylyndaǵy Mıchýrın atyndaǵy negizgi orta mektepte oqıtyn balalardyń ata-analarynan shaǵym túsken bolatyn. Jazba avtory ózin kópbalaly ana ekenin jáne mekteptegi birqatar bylyqtardyń oryn alǵanyn aıtady.
«Sálemetsiz be, Men Aqkól orman sharýashylyǵynmyn. Ne jazarymdy da bilmeımin. Men qazir ózimdi nashar sezinip otyrmyn. Men moraldyq turǵydan sharshadym jáne depressııaǵa ushyradym. Júıkem syr bere bastady. Men kóp balaly anamyn, tórt balam bar, onyń ekeýi stýdent, bireýi oqýshy jáne bireýi eki jasta. Budan bólek, jıenim jáne Vanıa esimdi bala turady, ol jetim, ony anam qamqorlyqqa aldy...», - deıdi jazba avtory.
Sonymen birge, ol mektepte balalardyń tamaqtandyrylýy durys uıymdastyrylmaǵanyn, oqýshylar tamaqtanyp júrgen taǵamnyń sapasy óte nashar ekenin alǵa tartýda.
«...Balalar sorpada jaǵymsyz ıis baryn aıtty. Keıbir balalardyń ishi aýyrdy. Mázirde harcho sorpasy dep kórsetilse, shyndyǵynda etsiz kúrish sorpasyn beredi. Kúrish, sý, kartop qýyrylǵan... Men jalǵyz emespin! Biz bes ata-anamyz, olar bizdi tyńdaǵysy kelmeıdi. Biz sizderden kómek surap ótinemiz. Bizdiń esep-qısaptan habarymyz joq. Biletinimiz azyq-túlik jetkiliksiz!...»,- dep sózin túıindedi avtor.
Osy másele boıynsha QazAqparat tilshisi Aqmola oblystyq bilim basqarmasyna saýal joldady. Ondaǵylar Aqkól orman sharýashylyǵy aýylyndaǵy Mıchýrın atyndaǵy negizgi orta mektepte osyndaı jaǵdaı oryn alǵanyn jáne aýdandyq bilim bóliminiń basshylary mektepke baryp, ata-analarmen kezdesý ótkizgenin aıtty.
«Mıchýrın atyndaǵy negizgi mekteptegi tamaqtandyrý máselesine keletin bolsaq, bilim oshaǵynda 49 oqýshy bilim alady. Aqkól aýdandyq bilim bólimi memlekettik satyp alý portalynda baıqaý ótkizilip, jeńimpaz bolyp jeke kásipker «Paýkova» tanyldy. Shartqa sáıkes ónim berýshi azyq-túlikti mektepke jetkizýdi júzege asyrady. Birinshi synyptyń barlyq oqýshylary men az qamtylǵan otbasylardan shyqqan balalar tegin, al basqa oqýshylar ata-analar tólemi esebinen tamaqtanady. Bilim bólimi basshylary mektepke baryp, ata-analarmen kezdesý ótkizdi», - dep túsindirdi QazAqparat tilshisiniń saýalyna Aqmola oblystyq bilim basqarmasynyń baspasóz qyzmetindegiler.
Vedomstvodan atap ótkendeı, atalmysh mektep dırektory qyzmetinen bosatylyp, tamaqtandyrýdy uıymdastyrý máselesi baqylaýǵa alynǵan.
«Laýazymdyq mindetterin tıisinshe oryndamaǵany úshin Aqkól aýdandyq bilim bólimine qarasty Aqkól orman sharýashylyǵy aýylyndaǵy Mıchýrın atyndaǵy negizgi orta mekteptiń dırektory T.S.Korn qyzmetinen bosatyldy. Tamaqtandyrýdy uıymdastyrý máselesi baqylaýǵa alyndy», - dep qosty vedomstvodan.
