Aqmola oblysynda Abaıdyń ádebı ortalyǵy ashyldy

KÓKShETAÝ. QazAqparat - Aqmola oblysynda uly Abaıdyń 175 jyldyǵyn merekeleý sheńberinde onlaın formatta túrli sharalar ótkizilip jatyr. Sonyń biri – Aqkól aýdandyq kitaphanasynda Abaıdyń ádebı ortalyǵy ashyldy, dep habarlaıdy QazAqparat tilshisi.

Ortalyqta halqymyzdyń uly aqyny, oıshyly Abaıdyń ómiri men shyǵarmashylyq álemine saıahat jasaýǵa bolady. Ortalyqtyń ashylýyna aýdandyq bıýdjetten qarjy bólingen.

«Memleket basshysy Qasym-Jomart Toqaev óziniń sózinde oqyrmandardyń saýatyn arttyrýǵa kóńil bólý kerktigin aıtqan bolatyn. Bul rette, kitaphananyń mańyzy zor. Alaıda, kóptegen kitaphanalar jańǵyrtýdy jáne tsıfrlandyrýdy qajet etedi. Al bizdiń kitaphanada jańa formattaǵy zaldarda alańsyz otyryp, kitap oqýǵa bolady», - deıdi aýdandyq kitaphana mamandary.

Aıta keteıik, Aqkól aýdandyq kitaphanasyna 1990 jyly uly Abaıdyń esimi berilgen. Búgingi tańda kitaphana qorynda 61000 ekzemplıar kitap bar. Onyń ishinde 6780 memlekettik tilde. Kitaphana úsh bólimnen turady. «Rabıs» júıesi kómegimen elektrondy katalog úshin bıblıografııalyq jazba júrgiziledi. Abonement, eki oqyrman zaly jáne ádisteme zalynan turatyn qyzmet kórsetý bólimi jumys isteıdi.

Budan bólek, aýdandyq kitaphanada 2007 jyldan bastap, Keńes odaǵynyń batyry, Halyq Qaharmany, QR Birinshi qorǵanys mınıstri, general maıor Saǵadat Nurmaǵambetovtyń mýzeıi bar.

2018 jyly kitaphanada «Rýhanı jańǵyrý» aýdandyq keńsesi men kovorkıng ortalyq ashyldy.

Aqkól aýdanynda ashylyp otyrǵan Abaıdyń ádebı ortalyǵy bul Aqmola oblysynda ashylyp otyrǵan úshinshi osyndaı ortalyq.