Aqmola oblysynda 100-den astam otbasy baspanaly boldy

KÓKShETAÝ. QazAqparat- QR Tuńǵysh Prezıdenti kúni qarsańynda Aqmola oblysynyń úsh aýdanynda jańa páterdiń kiltin tapsyrý rásimi ótti, dep habarlaıdy QazAqparat tilshisi oblystyq ishki saıasat basqarmasyna silteme jasap.

Vedomstvonyń málimetinshe, Tuńǵysh Prezıdent kúni Jarqaıyń aýdanynda 75 otbasyna merekelik qýanysh syılady. Aýdan ákimi Murat Balpan «Nurly jer» baǵdarlamasy boıynsha qalpyna keltirilgen kópqabatty turǵyn úıden jańa páterdiń kiltin saltanatty túrde tapsyrdy. Úsh bólmeli páterdiń kiltine ıe bolǵan kópbalaly ananyń biri - Janar Muqanova qýanyshyn bólisti.

«Búgingi qýanyshymdy sózben aıtyp jetkizý múmkin emes. Áli de ózime ózim sene alar emespin. Biz sııaqty kópbalaly otbasylarǵa udaıy qamqorlyq kórsetip otyrǵan Elbasyna alǵysym sheksiz», - deıdi ol.

Jarqaıyń aýdany ákimdiginiń málimetine súıensek, atalmysh turǵyn úı «Nurly jer» baǵdarlamasy boıynsha oblystyq bıýdjetten bólingen 259 mıllıon teńge qarjyǵa qalpyna keltirilgen. Sonymen qatar, aýdanda oblystyq bıýdjetten taǵy 60 páterli turǵyn úıdi qalpyna keltirý jumysyna aqsha bólingen.

Al, Jaqsy aýdanynda áleýmettik jaǵynan az qamtylǵan, kópbalaly otbasylar, jetimder, tolyq emes otbasylar, múmkindigi shekteýli jandarǵa 27 páterdiń kilti tapsyryldy. Osy aýdanda «TNK agrofırmasy» JShS eki páterli jeti úı saldy. Onyń altaýyn áleýmettik jaǵynan az qamtylǵan otbasylarǵa berý josparlanǵan.

Sonymen qatar, QR Tuńǵysh Prezıdenti kúni arnalǵan merekelik shara Bulandy aýdanynda da ótti. Onda aýdan ákimi Talǵat Erseıitov «Nurly jer» baǵdarlamasy sheńberinde aýyldyq jerde turatyn kópbalaly tórt otbasyna jańa páterdiń kiltin tapsyrdy.

Jalpy, Aqmola oblysy boıynsha turǵyn úı qurylysy salasynda 5 myńǵa jýyq páter tapsyrý josparlanǵan.