Aqmola oblysyna Pfizer vaktsınasynyń 35 myń dozasy ákelinedi

KÓKShETAÝ. QazAqparat - Oqý jylynyń basynan beri oblysta oqýshylar arasynda koronavırýs juqtyrýdyń 1202 jaǵdaıy tirkeldi. Óńirdiń 34 mektebinde 43 synyp qashyqtan oqytý formatyna aýystyryldy, dep habarlaıdy QazAqparat tilshisi oblystyq ishki saıasat basqarmasyna silteme jasap.

Sanıtarlyq-epıdemıologııalyq baqylaý departamentiniń málimetinshe, ótken jylmen salystyrǵanda 14 jasqa deıingi balalar arasynda aýrý 18 esege, 15-ten 17 jasqa deıin 25 esege ósti.

«Búgingi tańda tek vaktsınatsııa aýrýdyń ósýin azaıta alady, bul birneshe ret tıimdi ekenin dáleldedi. Jaqynda Aqmola oblysyna Pfizer/BioNTech vaktsınasy ákelinedi. Aýdandarǵa vaktsınalardy medıtsınalyq uıymdar boıynsha saqtaý, tasymaldaý boıynsha nusqaýlyqtar, sondaı – aq azamattardy vaktsınatsııalaý tártibi jetkizildi», - dedi vedomstvodan.

Dúnıejúzilik densaýlyq saqtaý uıymy maquldaǵan preparatty vaktsınatsııalaýmen barlyǵy 66 myńnan astam adam qamtylatyn bolady, onyń ishinde balalar men jasóspirimder – 47 myń, júkti áıelder – 8,3 myń, laktatsııa kezeńinde áıelder – 10,8 myń.

Oblystyń bas pedagogy Beıbit Júsipov atap ótkendeı, balalardy vaktsınatsııalaý ata-analardyń kelisimimen ǵana júrgiziledi.

«Vaktsınatsııa ata-analardyń nemese olardyń zańdy ókilderiniń erikti aqparattyq jazbasha kelisiminen keıin oblystyń bilim berý uıymdarynda jáne egý pýnktteri jelisinde júrgiziledi. Qalaýy boıynsha ata-analar balalaryn vaktsınatsııalaý sharasyna emhanada da, mektepte de qatysa alady», - dep túsindirdi basshysy.

Eske sala keteıik, óńirge -90, -60 ýltra tómen temperatýralyq rejımdi qoldaıtyn 2 muzdatqysh kamerasy jetkizildi. Vaktsınalardy tasymaldaýǵa 2 avtorefrıjerator tartylǵan. Jaqynda eki ret vaktsınatsııalaý úshin 35 100 doza vaktsına jetkizilmekshi.