Aqmola oblysynyń kóktemgi sý tasqynyna daıyndyǵy qandaı?
KÓKShETAÝ. KAZINFORM - Aqmola oblysynda kóktemgi sý tasqyny qaýip-qateriniń aldyn alý boıynsha daıyndyq sharalary bastalyp ketti. Oblystyq bıýdjetten Tótenshe jaǵdaılar departamentine kólikke, ǵaryshtyq monıtorıngke, jarylys jumystaryna 69,8 mln teńgeden astam qarajat bólindi.
Aýmaqtyq TJD baspasóz qyzmetiniń málimetinshe, Aqmola oblysy ákiminiń «Kóktemgi kezeńdegi sý tasqynyna qarsy sharalar týraly» qaýlysyna, sondaı-aq, oblys aýmaǵynda kóktem mezgilinde sý tasqynyna daıyndyq jáne aǵyn sýdy aptasyz ótkizý jónindegi is-sharalar josparyna sáıkes júrgiziledi
«Jalpy, oblystyq bıýdjetten 2024 jylǵa yqtımal tótenshe jaǵdaılardy aldyn alýǵa jáne joıýǵa, jergilikti atqarýshy organdardyń shuǵyl shyǵyndaryna, sondaı-aq, tabıǵı jáne tehnogendik apattardy joıý úshin qajetti barlyǵy 2 mlrd 239 mln teńge qarjy rezervi bekitildi. Al oblystyq bıýdjetten tótenshe jaǵdaılar departamentine kólikke, ǵaryshtyq monıtorıngke, jarylys jumystaryna 69,8 mln teńgeden astam qarajat bólindi», - dedi vedomstvonyń baspasóz qyzmetinen.
Aıtýynsha, búgingi kúnge deıin oblys boıynsha tótenshe jaǵdaıdyń aldyn alý úshin 236,4 tonna janar-jaǵarmaı, 21,8 myń tonna ınertti materıaldar, 81,7 myń qap qory jasaldy. Sý tasqyny qaýpiniń aldyn alýǵa 398 adam, 73 birlik tehnıka, 82 motopompa, 10 júzý quraldary jumyldyrylmaqshy. Buǵan qosa, barlyq menshik nysanynda 2032 adam jáne 1005 tehnıka qarastyrylǵan.
«Al «Qazgıdromet» respýblıkalyq kásiporny oblystyq fılıalynyń málimetinshe, oblys aýmaǵynda jaǵdaıǵa monıtorıng jasaıtyn jáne boljaıtyn 15 meteopost, 34 gıdropost jáne 15 agrometeopost bar. Qar sýy erigen kezde ózenderdegi jaǵdaıǵa monıtorıng jasaý úshin 82 ýaqytsha baqylaý beketteri táýlik boıy kezekshilik atqarady. Búgingi tańda ózinde sý basý qaýipi bar aýdandardan 486,5 myń tekshe qar shyǵaryldy. Sonymen birge, naýryz aıynda 10 aýdanda ózen sýlarynyń betinde jalpy 20 750 sharshy metr aýmaqta muzdy qopsytý jáne jarý jumystary qolǵa alynbaq. Osy baǵytta «KDM HOLDING» jáne «BVR – tehnoservıs» jaýapkershiligi shekteýli seriktestikterimen muz barý jumystaryn júrgizý úshin kelisimshart jasaý máselesi qarastyrylyp jatyr», - dep tolyqtyrdy vedomstvodan.
Eske salaıyq, budan buryn Úkimette sý tasqynyna daıyndyq máselesi qaralǵan bolatyn.