Aqmola oblysynyń dıqandary mol astyqtan úmitti
KÓKShETAÝ. KAZINF0RM — Bıyl Aqmola oblysynyń dıqandary mol astyqtan úmitti. Elimizde ósiriletin bıdaıdyń tórtten birin óndiretin óńirde rekordtyq ónim jınaý josparlanyp otyr.
Kúzgi egin oraǵy naýqanynyń barysy týraly Aqmola oblysynyń aýyl sharýashylyǵy jáne jer qatynastary basqarmasy basshysynyń orynbasary Erkesh Álenov aıtyp berdi.
Onyń aıtýynsha, óńirde naýqandy belgilengen kestege saı júrgizý úshin qajettiniń barlyǵy jasalǵan, tek aýa-raıy kedergi keltirmese bolǵany.
Qazirgi tańda oblystyń birqatar aýdandaryndaǵy sharýashylyqtar kúzgi astyq jınaýǵa kirisken.
Jalpy, oraq jumystaryn bıyl 5,4 mln gektar alqapta júrgizý josparlanǵan, onyń 4,7 mln gektary — dándi daqyl.
«Bıyl eginniń ósýi jaman emes, tek pisip-jetilip úlgermeı jatyr. Jaýyn-shashyn jappaı naýqanǵa kirisýge sál kedergi bolyp otyr. Degenmen, sharýashylyqtar eginge shalǵy sala bastady. Naýqannyń alǵashqy kúnderi 41 myń gektar alqaptyń astyǵy jınaldy. Mundaǵy gektar berekesi ortasha 11,2 tsentnerden aınalýda. Al Atbasar aýdanynyń „Shýıskoe“ jaýapkershiligi shekteýli seriktestiginde bul kórsetkish — gektaryna 25 tsentner», — deıdi Erkesh Álenov.
Oblysta naýqanǵa 9 myńǵa jýyq kombaın (jartysynan astamy qazirgi zamanǵy ónimdiligi joǵary kombaındar), 2,6 myń shalǵy, 5 myń avtokólik jumyldyrylady.
Al astyqty jalpy syıymdylyǵy 4,3 mln tonna bolatyn 65 lıtsenzııalanǵan astyq qabyldaý kásiporny qabyldaıdy.
Buǵan qosa, aýyl sharýashylyǵy taýaryn óndirýshilerdiń menshiginde 2,8 mln tonnalyq astyq qoımasy bar.
Sonymen birge, óńirde aýyl sharýashylyǵy qurylymdaryn janar-jaǵarmaımen qamtamasyz etý máselesi de birtindep sheshilip keledi.
«Egin jınaý jumysyn júrgizýge 83,4 myń tonna dızel otynynyń kepildendirilgen kólemi bólindi. Arzandatylǵan janar-jaǵarmaı baǵasy 250 teńgeden. Qazirgi ýaqytta 51 myń tonnany jetkizý operatorlarymen kelisimshart jasaldy. Sharýashylyqtarǵa búgingi kúni 10 myń tonna janarmaı jetkizildi», — dep tolyqtyrdy Erkesh Álenov.
Aıta ketsek, budan buryn Aqmola oblysynyń eginshileri kúzgi astyq jınaý naýqanyna kiriskenin jazǵan edik.
