Aqmola oblysynyń 214 myń adamy Astanada jumys istep júr – óńir ákimi

214 myń turǵyn kúndiz Astanada jumys istep, túnde Aqmola oblysynyń aýmaǵynda túnep júr. Aımaq ákimi Marat Ahmetjanov ortalyq kommýnıkatsııalar qyzmetinde ótken brıfıngide osyndaı derek keltirdi, dep habarlaıdy Kazinform.

«Kezinde shaǵyn eldi meken bolǵan aýyldarda qazir halyq sany aýdandarǵa teteles bolyp ketti. Tipti asyp ketken aýyldar bar. Mysaly, Qoıandy aýylynda 40 myń, Jibek jolynda 30 myńnan astam, Qaraótkel men Talapkerde de 30 myńnan astam adam turady. Qosshydan resmı sanaq boıynsha 52 myń adam, shynynda 100 myńnan astam adam turatynyn aıttym», - dedi ol.

Ákimniń málimeti boıynsha, oblystan Astanaǵa baryp jumys isteıtin halyqtyń sanyn anyqtaý úshin bir aı boıy zertteý júrgizilgen eken.

«Bir aıdyń ishinde úlken taldaý júrgizdik. Telefon nómirleri arqyly sanaq júrgizgen kezde anyqtadyq. Aqmola oblysynyń 214 myń turǵyny kúndiz Astana qalasynda júrse, túnde Aqmola oblysynda túneıdi eken. Árıne, ony toqtatý úshin biraz dúnıe qarastyryp jatyrmyz. Eń bastysy, aglomeratsııa týraly zańdy paıdalanyp, Úkimet qaýlysyn daıyndap jatyrmyz. Sol Qaýlyda Astanaǵa irgeles eldi mekenderdi gazben, jylýmen, sýmen, jaryqpen qamtamasyz etetin jobalar bar. Qolaıly jaǵdaı týǵyzyp qana qoımaı, jaqsy mektep pen aýrýhana, jaqsy mádenıet ortalyqtaryn, jaqsy sport nysandaryn salý kerek. Qosshy qalasynda ol jumys bastaldy. Byltyr jeke menshik ınvestıtsııa arqyly quny 7,5 mlrd teńge bolatyn zamanaýı talapqa saı mektep salyndy. Ondaı mektep Qazaqstanda joq deýge de bolady. Endi taǵy jeke ınvestıtsııa esebinen úlken mádenı, sport jáne qoǵamdyq ortalyq salynyp jatyr. Onyń quny 9,5 mlrd teńge. Qurylysy bastalyp ketti, 14 aıda salynyp bitý kerek. Jeke ınvestıtsııa esebinen kúnine 1200 adam qabyldaıtyn emhana salynady», - dedi óńir basshysy.