Aqmola oblysynda joq páterdi «jalǵa berip kelgen» alaıaq ustaldy
KÓKShETAÝ. KAZINFORM — Aqmola oblysynda joq páterdi jalǵa berip kelgen ınternet-alaıaǵy ustaldy, kúdiktiniń 8 qylmysqa qatysy bary tekserilýde.
Oblystyq PD baspasóz qyzmetiniń málimetinshe, kúdiktini Aqmola oblysynyń PD Krımınaldyq polıtsııa basqarmasy kıberqylmysqa qarsy kúres bóliminiń qyzmetkerleri qolǵa túsirgen.
Aldyn ala anyqtalǵandaı, 22 jastaǵy er adam buryn da alaıaqtyq úshin jaýapqa tartylǵan. Bul joly ol Instagram áleýmettik jelisinde jáne Krysha.kz saıtynda páterdi jalǵa berý týraly jalǵan habarlandyrýlar ornalastyryp, habarlasqan adamdardan bank kartasy arqyly aldyn-ala tólem alǵan. Keıin aqsha alǵan klıentteriniń telefon nómirlerin buǵattap otyrǵan.
«Qazirgi ýaqytta er adamnyń alaıaqtyq boıynsha 8 qylmysqa qatysy bary tekserilýde, onyń altaýy Aqmola oblysy aýmaǵynda jasalǵan. Osyǵan baılanysty Qylmystyq kodekstiń 190 babynyń 2 bóligi boıynsha sotqa deıingi is qozǵalyp, tergeý amaldary júrgizilýde», — deıdi Kıberqylmysqa qarsy kúres bóliminiń bastyǵy Ermek Manatov.
Aıta ketsek, budan buryn Qosshyda salyq organynyń qyzmetkeri birneshe ret ınternet-alaıaqtyq jasaǵanyn jazǵan edik.
