Aqmola oblysynda zańbuzýshylyqtardyń aldyn alýmen drondar aınalysa bastady

ASTANA. KAZINFORM — Aqmola oblysynda drondar túrli mańyzdy salalardaǵy zań buzýshylyqtardyń aldyn alýǵa kiristi. Bul týraly Aqmola oblysynyń tsıfrlandyrý jáne arhıvter basqarmasy KazInform saýalyna bergen jaýabynda málimdedi.

- Aımaqta memlekettik jáne ınfraqurylymdyq jobalardy basqarýdyń ashyqtyǵy men tıimdiligin arttyrýǵa baǵyttalǵan «Biryńǵaı dron ınfraqurylymy» pılottyq jobasy iske qosyldy. Bul júıe mektepter men joldardyń qurylysyna monıtorıng júrgizýge, jylý jelileriniń jaǵdaıyn baqylaýǵa, jer qoınaýyn paıdalaný salasyndaǵy zań buzýshylyqtardy anyqtaýǵa jáne turǵyn úı-kommýnaldyq sharýashylyq qyzmetiniń sapasyn arttyrýǵa múmkindik beredi. Qazirgi ýaqytta joba josparly rejımde iske asyrylyp jatyr, - deıdi basqarma mamandary.

Oǵan qosa ákimdik zańsyzdyqtardy boldyrmaý úshin qansha dronnyń jumys istep jatqanyn da aıtty.

- Memorandým aıasynda 4 ushqyshsyz ushý apparaty berildi. Onyń 2-i Kókshetaý qalasynda, 1-i Qosshy qalasynda paıdalanylsa, taǵy 1 mobıldi dron shalǵaıdaǵy eldi mekenderdegi aýmaqtardy tekserýge arnalǵan. Jobany keńeıtý jáne onyń tıimdiligin baǵalaý barysynda drondar sanyn arttyrý múmkindigi qarastyrylady, - deıdi olar.

Biryńǵaı drondar ınfraqurylymyn júzege asyratyn «Qazaqtelekom» aktsıonerlik qoǵamy. Olar joba 2029 jylǵa deıin jalǵasatynyn aıtady.

- Qazirgi ýaqytta «Qazaqtelekom» AQ balansynda 11 dron bar, al jyl sońyna deıin qosymsha 89 dron satyp alý josparlanǵan. Jalpy, joba aıasynda Qazaqstan boıynsha 100 dron paıdalanylady. Joba «Qazaqtelekom» AQ-nyń menshikti qarajaty esebinen júzege asyrylady. Eger joba sátti júzege assa, ony Qazaqstannyń basqa óńirlerinde keńeıtý jáne qosymsha drondar satyp alý josparlanyp otyr, - deıdi «Qazaqtelekom» AQ tsıfrlyq bıznes dıvızıonynyń qyzmetkerleri.

Kompanııa jyl sońyna deıin ushqyssyz ushý qurylǵylaryn tómende kórsetilgen óńirlerde de iske qosýdy josparlap otyr:

1. Almaty oblysy;

2. Qyzylorda oblysy;

3. Aqtóbe oblysy;

4. Pavlodar oblysy;

5. Shyǵys Qazaqstan oblysy;

6. Astana qalasy;

7. Almaty qalasy.

Aıta keteıik, bul bastama QR Prezıdentiniń 2024 jylǵy 11 jeltoqsandaǵy hattamalyq tapsyrmasyna sáıkes, oblystardyń, respýblıkalyq mańyzy bar qalalardyń jáne Elorda ákimderimen birlesip ekologııa, abattandyrý jáne halyqtyń qaýipsizdigi salalarynda jobalardy júzege asyrýdy baqylaý maqsatynda iske qosylǵan bolatyn.

Dál osyndaı drondar SQO-ǵa da berilgen. Al olar qurylǵylardy sý tasqyny qaýpin baqylaý úshin qoldanatyndaryn aıtady.